“Əl-Nəsr”in portuqal hücumçusu və kapitanı Kristiano Ronaldo “Real”ın ingiltərəli yarımmüdafiəçisi Cud Bellingemi qiymətləndirib.
Arena.az portuqal ulduzun bu barədə qənaətini təqdim edir:
“Cud Bellingem böyük istedaddır. Fikrimcə, o, “Qızıl top”u qazana bilər”, deyə Kristiano Ronaldo gənc oyunçunun perspektivinə inandığını vurğulayıb.
Yeri gəlmişkən, İngiltərə yığmasının keçmiş müdafiəçisi Ceymi Karrager alman mütəxəssis Tomas Tuxelin rəhbərliyi altında “üç şir”in oyununun hansı futbolçular ətrafında qurulacağından söhbət açıb. İngilis təhlilçinin bu barədə fikrini təqdim edirik:
“İngiltərə yığması Cud Bellingem və Koul Palmerin dövrünə girmək üzrədir. Palmer İngiltərə yığmasının oyunçularının reytinqində Fil Fodeni geridə qoyub. O, başlanğıc onbirliyində olmalıdır, Dünya Kubokunun seçmə oyunları isə Tuxel üçün bu iki maraqlı gənc oyunçu ətrafında komanda qurmaq üçün mükəmməl fürsətdir”, deyə Karrager bildirib.
Xatırladaq ki, Cud Bellingem “Real”a 2023-cü ilin iyun ayının əvvəlində 103 milyon avro məbləğ müqabilində Dormund “Borussiya”sından keçib. Hücumameylli yarımmüdafiəçi İspaniya nəhəngi ilə müddəti 2029-cu ilin iyun ayının sonuna qədər qədər nəzərdə tutulmuş müqaviləyə imza atıb.
Cari mövsümdə Bellingem “Real” üçün bütün yarışlarda 22 oyun keçirib, 8 qol vurub, 7 məhsuldar ötürmə verib. İngilis yarımmüdafiəçinin “Real”ın heyətində çıxışının ümumi mənzərəsi 65 oyun, 31 qol və 20 məhsuldar ötürmədən ibarətdir.
Bellingem “Real”la İspaniya Super Kubokunun (2024), İspaniya La Liqasının (2023/2024), UEFA Çempionlar Liqasının (2023/2024), UEFA Super Kubokunun (2024), FIFA Qitələrarası Kubokun qalibi olub.
Cud Bellingem 2020-ci ilin noyabr ayında debüt etdiyi İngiltərə yığmasının heyətində 40 oyun keçirib, 6 qol vurub və 9 məhsuldar ötürmə verib.
“Transfermarkt” internet-portalı 21 yaşlı ingilis yarımmüdafiəçinin transfer dəyərini 180 milyon avro məbləğində qiymətləndirir.
