Bakı, 9 yanvar, AZƏRTAC
Ötən il gənclər paytaxtı elan edilən Lənkəran şəhərində “Bir Könüllü” Tələbələrin Əməkdaşlığı İctimai Birliyinin təşkilatçılığı, Gənclər və İdman Nazirliyinin maliyyə dəstəyi, İnnovasiya və Rəqəmsal İnkişaf Agentliyi və SABAH.HUB-ın tərəfdaşlığı ilə həyata keçirilən “Ecopreneurship: Dayanıqlı gələcək üçün region gənclərinin bacarıqlarının artırılması” layihəsi başa çatıb.
SABAH.HUB-dan AZƏRTAC-a bildirilib ki, Lənkəran, Cəlilabad və Astaradan 30 gənci əhatə edən layihənin əsas məqsədi region gənclərini innovasiya ekosistemi ilə tanış etmək, sosial və ekoloji problemlərin həllində təşəbbüskarlıq göstərmələrini stimullaşdırmaq və innovativ həll yolları yaratmağa təşviq etmək olub.
Bu çərçivədə iştirakçılara startap anlayışı, dayanıqlı sahibkarlıq, biznes modelinin qurulması, maliyyə idarəetməsi, müştəri identifikasiyası və pitch deck hazırlanması kimi mövzular üzrə təlimlər keçirilib. Eyni zamanda, ideyaların praktik tətbiq imkanlarının öyrənilməsi üçün tərəfdaş qurumları təmsil edən təcrübəli mütəxəssislərin iştirakı ilə mentorluq sessiyaları təşkil edilib.
Bağlanış mərasimində iştirakçılar öz innovativ və dayanıqlı biznes ideyalarını təqdim edərək layihənin yekun nəticələrini nümayiş etdiriblər. Təqdim olunan ideyalar münsiflər heyəti tərəfindən problemi həll etmək potensialı, orijinallıq və dayanıqlılıq kimi kriteriyalar əsasında qiymətləndirilib və ən uğurlu ideyalar seçilib.