İspaniya La Liqasının 19-cu turunda “Osasuna” ilə qarşılaşan Madrid “Atletiko”su ardıcıl qələbələrin sayına görə yeni rekorda imza atıb.
Arena.az xatırladır ki, paytaxt klubu doğma meydanda baş tutan bu görüşdə 1:0 hesablı qələbəyə sevinib.
“Opta Sport”un yaydığı məlumata görə, Dieqo Simeonenin baş məşqçisi olduğu komanda bu mövsüm iştirak etdiyi bütün turnirlərdə ardıcıl 14 qələbə qazanıb.
Madrid təmsilçisi İspaniya çempionatında ardıcıl 8 qələbəyə sevinib. Komandanın həmçinin İspaniya Kubokunda və UEFA Çempionlar Liqasının Liqa mərhələsində üç qələbəsi var.
Xatırladaq ki, daha əvvəl “Atletiko”nun ən yaxşı seriyası 2012-ci ilin avqust-oktyabr aylarında qazanılmış ardıcıl 13 qələbədən ibarət idi. Həmin vaxt da komandaya argentinalı mütəxəssis rəhbərlik edirdi.
Madrid “Atletiko”su İspaniya La Liqasında 19 turdan sonra 44 xalla turnir cədvəlinə başçılıq edir.
