Fransa yığmasının keçmiş hücumçu Tyerri Anri “Real”ın fransalı ulduz hücumçusu Kilian Mbappenin müdafiəsinə qalxıb.
Arena.az “Mundo Deportivo” nəşrinə istinadən məlumat verir ki, Anri, Mbappenin mərkəz hücumçusu mövqeyində oynamasından sonra məruz qaldığı tənqidləri cavablayıb:
“Ona hücumçu mövqeyində oynamağı öyrənmək üçün vaxt gərəkdir, xüsusən də əsaslı hazırlığınız olmayanda və mən bunu deyə bilərəm, çünki mənim də əsaslı hazırlığım yox idi. Amma ümidvaram ki, o, inkişaf edir və tərəqqi əldə etməlidir. Buna öyrəşmədiyiniz zaman zəif cəhətlərinizi görə biləcəyimiz bir vəziyyətdə özünüzü tapmaq tamamilə adi haldır, halbuki əvvəllər biz bunların fərqində deyildik. Hansısa məqamda hamı onun robot olduğunu düşünürdü. O, robot deyil, hamı kimi duyğulara malik olan bir insandır. Hərdən isə o, hirslənir və əllərini yuxarı qaldırır”, deyə Tyerri Anri fikrini əsaslandırıb.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Kilian PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 28 oyuna çıxıb, 15 qol vurub, 4 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) və FIFA Qitələrarası Kubokun (2024) qalibi olub.
“Transfermarkt” internet-portalı 26 yaşlı fransalı hücumçunun transfer dəyərini 160 milyon avro məbləğində qiymətləndirir.
