QHT.az xəbər verir ki, "İnsan alverinə qarşı mübarizə: mövcud vəziyyət və gözləntilər" mövzusunda keçirilən ictimai müzakirədə Beynəlxalq Miqrasiya Təşkilatının (BMqT) nümayəndəsi Anar İsgəndərov insan alverinin müasir dövrün ən ciddi və geniş yayılan problemlərindən biri olduğunu vurğulayıb. O, hər il təxminən 25 milyon insanın zorakılıq, hədə, yalan vədlər və digər qanunsuz vasitələrlə istismara məruz qaldığını, həmçinin bu cinayətdən illik 150 milyard ABŞ dolları qeyri-qanuni gəlir əldə edildiyini bildirib. Bu vəziyyətin əmək bazarlarına və insan ləyaqətinə ağır zərbə vurduğunu qeyd edib:
"BMqT insan alverinə qarşı mübarizə üçün bir neçə əsas istiqamətdə fəaliyyət göstərir. Maarifləndirmə və profilaktika yolu ilə həssas qruplar arasında məlumatlandırma işləri aparılır və bu, cinayətin erkən mərhələdə aşkarlanmasına şərait yaradır. Qurbanların müəyyən edilməsi və onlara dəstək göstərilməsi üçün hüquq-mühafizə orqanları və qeyri-hökumət təşkilatları ilə sıx əməkdaşlıq edilir. Sosial reinteqrasiya və reabilitasiya vasitəsilə qurbanlara maddi və psixososial dəstək göstərilir ki, onlar yenidən müstəqil həyat sürə bilsinlər. Nəhayət, insan alveri qlobal bir problem olduğundan, onun həlli beynəlxalq əməkdaşlığı tələb edir. BMqT müxtəlif dövlətlər arasında əməkdaşlıq platformaları yaradır və bu mübarizəni gücləndirir.
Texnologiyanın bu mübarizədə rolu xüsusi qeyd olunmalıdır. BMqT-nin “Counter-Trafficking Data Collaborative” (CTDC) kimi qlobal məlumat platformaları vasitəsilə insan alveri ilə bağlı strategiyalar təkmilləşdirilir. “Uşaqlar üçün Təhlükəsiz Gələcək” proqramı çərçivəsində yüz minlərlə uşaq reabilitasiya olunub və bu da təşkilatın humanitar səylərinin uğurlu nümunəsidir. Azərbaycanın bu sahədə gördüyü tədbirlər beynəlxalq standartlara uyğun şəkildə inkişaf edir. BMqT-nin hökumətlə əməkdaşlığı çərçivəsində qurbanların hüquqi müdafiəsi, sosial və psixoloji dəstək proqramlarının təşkili və risk altında olan şəxslər üçün maarifləndirmə işləri həyata keçirilir".
Anar İsgəndərov həmçinin bildirib ki, bununla belə, texnologiya insan alverçilərinə qurbanları müəyyən etmək və manipulyasiya etmək üçün yeni vasitələr təqdim edir:
"Alverçilər sosial media və onlayn platformalar vasitəsilə yalan vədlər irəli sürərək insanları tələyə salır və sextortion kimi cinayətləri həyata keçirirlər. Şifrələmə və anonimlik imkanları insan alverinə qarşı mübarizədə hüquq-mühafizə orqanlarının işini daha da çətinləşdirir. Sosial mediada yanlış məlumatların yayılması da bu cinayət haqqında ictimai təsəvvürləri təhrif edir və diqqəti əsas istismar növlərindən yayındıra bilər. Qeyri-hökumət təşkilatları (QHT-lər) texnologiyadan istifadə edərək sağ qalan şəxslərə onlayn məsləhət, qaynar xətlər və resurslara daha asan çıxış imkanı təmin edir. "İnsan Alverinə qarşı Təşkilatların İnteraktiv Xəritəsi" kimi təşəbbüslər qlobal əməkdaşlığı gücləndirir və bu sahədə koordinasiya səylərini artırır. Texnologiya sektoru da bu mübarizədə mühüm rol oynayır, lakin daha çox təhlükəsizlik tədbirləri və hüquq-mühafizə orqanları ilə əməkdaşlıq tələb olunur. Yalnız birgə səylərlə insan alverinə qarşı mübarizə aparmaq, qurbanların həyatını yenidən qurmaq və insan hüquqlarını qorumaq mümkündür. Bu günkü tədbir bu istiqamətdə yeni təşəbbüslərə zəmin yaradır və birgə səylərimizin gücünü bir daha göstərir".
