Meksikada bir trambolin parkında baş verən güclü yanğın panika yaradıb.
Musavat.com xəbər verir ki, yanğın qısa müddətdə böyük alovlara çevrilərək ərazidəki digər obyektlərə də sıçrayıb.
Şahidlərin bildirdiyinə və videodan da göründüyünə görə, hadisə zamanı parkdan qalxan tüstü və alovlar şəhərin müxtəlif nöqtələrindən görsənib.
Məlumata görə, hadisə nəticəsində trambolin parkı tamamilə yanıb külə dönüb. Həmçinin, yaxınlıqdakı bəzi iaşə obyektlərinə və maşınlara da ciddi zərər dəyib. Xoşbəxtlikdən, ilkin məlumatlara əsasən, insan itkisi və ya ciddi xəsarət qeydə alınmayıb.
Yanğının başvermə səbəbləri hələ ki, məlum deyil. Hadisə yerində yanğınsöndürənlər və müvafiq təhqiqat qurumları araşdırmalara başlayıblar. Ehtimallara görə, yanğının elektrik xətləri və ya texniki nasazlıq səbəbindən baş verməsi mümkündür.
Sosial mediada geniş yayılmış görüntülərdə alovların trambolin parkını necə əhatə etdiyi və tüstünün ətrafı bürüdüyü aydın görünür. Yanğının baş verdiyi anlarda ətrafdakı insanların təşviş içində qaçdığı müşahidə olunur.
Meksika hakimiyyəti hadisə ilə bağlı əlavə məlumatların yaxın günlərdə paylaşılacağını bildirib.
Musavat.com
