“Real”ın baş məşqçisi Karlo Ançelotti məşqçilik fəaliyyəti dövründə çalışdırdığı ən yaxşı beş futbolçunun adını çəkib.
Arena.az “Give me Sport” dərgisinə istinadən, italyan mütəxəssisin bu barədə fikrini təqdim edir:
“Çalışdırdığım ən yaxşı oyunçular? Mən Ronaldo, Kristiano Ronaldo, Zlatan İbrahimoviç, Kərim Benzema və Vinisius Juniorun adını çəkəcəyəm”, deyə təcrübəli məşqçi bildirib.
Karlo Ançelotti məşqçiliyə 1992/1993-cü illər mövsümündə, İtaliya yığmasında baş məqşçinin köməkçisi olaraq başlayıb. 1995/1996-cı ilər mövsümündən isə italyan mütəxəssis müstəqil surətdə məşqçiliyə baş vurub.
Xatırladaq ki, 65 yaşlı italyan mütəxəssisin “Real”la ilk macərası 2013-2015-ci illəri əhatə edib. Daha sonra 2021-ci ildə “Kral klubu”na geri qayıdaraq, Ançelotti indiyədək “qaymaqlılar”ı çalışdırır. Karlo Ançelottinin İspaniya nəhəngi ilə müqaviləsi 2026-cı ilin iyun ayının sonuna qədər qüvvədədir.
Rəhbərliyi müddətində Ançelotti “Real”ı 323 oyuna çıxarıb, 233 qələbə, 45 heç-heçə, 45 məğlubiyyət yaşayıb. İtalyan mütəxəssisin rəhbərliyi altında “qaymaqlılar”ın top fərqi isə 784:309 nisbətindədir.
Təcrübəli mütəxəssisin rəhbərliyi altında “Real”ın qazındığı qalibiyyətlərə İspaniya La Liqası (2021/2022, 2023/2024), İspaniya Kral Kuboku (2013/2014, 2022/2023), İspaniya Super Kuboku (2021/2022, 20223/2024), Çempionlar Liqası (2013/2014, 2021/2022, 2023/2024), UEFA Super Kuboku (2014, 2022, 2024) və FIFA Klub Dünya Kuboku (2014, 2022) və FIFA Qitələrarası Kubok (2024) daxildir.
Qeyd edək ki, Karlo Ançelottinin məşqçilik məktəbindən həmçinin “Everton”, “Napoli”, “Bayern”, PSJ, “Çelsi”, “Milan”, “Yuventus”, “Parma” və “Recana” keçiblər.
