Türkiyə Böyük Millət Məclisinin Səhiyyə, Ailə, Əmək və Sosial Məsələlər Komissiyasının sədri, millət vəkili Vedat Bilgin Azərbaycana səfəri çərçivəsində Azərbaycan Respublikası Milli Məclisinin deputatı Tənzilə Rüstəmxanlı ilə görüşüb.
Yenicag.az xəbər verir ki, Azərbaycan Respublikası Milli Məclisində baş tutan görüşdə, Azərbaycan-Türkiyə münasibətləri ilə bağlı fikir mübadiləsi aparılıb. Qardaş ölkə Türkiyədə və ölkəmizdə baş verən siyasi proseslərin mahiyyəti və əhəmiyyətindən söz açılıb.
Millət vəkili Tənzilə Rüstəmxanlı qonaqları salamlayaraq bildirib ki, qardaş Türkiyənin Bolu bölgəsində yanğın nəticəsində çox sayda insanın həlak olması hər bir soydaşımızı dərindən kədərləndirib.
Həlak olmuş şəxslərin ailələrinə və yaxınlarına, qardaş Türkiyə xalqına dərin hüznlə başsağlığı verərək, xəsarət alanlara tanrıdan şəfa diləyib.
T.Rüstəmxanlı Türkiyənin siyasi təşkilatları və vətəndaş cəmiyyəti arasında müştərək layihələrin reallaşdırılması, səmərəli və qarşılıqlı faydalı əməkdaşlıq münasibətlərinin qurulması, həmçinin Türkiyə ilə vətəndaş cəmiyyəti sahəsində əməkdaşlığının gücləndirilməsindən söz açıb.
Türkiyə Böyük Millət Məclisinin Səhiyyə, Ailə, Əmək və Sosial Məsələlər Komissiyasının sədri, millət vəkili Vedat Bilgin Tənzilə Rüstəmxanlıya millət vəkili kimi mühüm vəzifəni uğurla yerinə yetirməkdə müvəffəqiyyətlər arzu edib və qeyd edib ki, Türkiyə ilə Azərbaycan arasında yalnız siyasi əlaqələrin deyil, eyni zamanda, mədəni və sosial sahələrdə də əməkdaşlığın inkişafı vacibdir.
