Misirli mərkəz hücumçusu Ömər Marmuş Frankfurt “Ayntraxt”ından tamhüquqlu əsasda “Mançester Siti”yə keçidini şərh edib.
Arena.az “Mançester Siti”nin rəsmi saytına istinadən, misirli futbolçunun bu barədə fikrini təqdim edir:
“Mən bu günü heç vaxt unutmayacağam. Dünyanın ən yaxşı komandalarından biri olan “Mançester Siti” ilə müqavilə imzalamağım heyrətamiz bir duyğudur. Mən çox şadam, ailəm mənimlə fəxr edir və biz hamımız Mançesterdə olmaqdan çox xoşbəxtik. “Pep”, onun heyəti və dünya səviyyəli imkanları sayəsində buradakı oyunçular təkmilləşmək üçün gərəkli hər bir xüsusa malikdirlər. Buraya gəlmək imkanım olanda bu, mənim üçün çox cazibədar oldu.
Mən də qənimətlər qazanmaq istədiyimi inkar edə bilmərəm. “Mançester Siti” uzun illərdir İngiltərənin ən uğurlu klubudur, ona görə də bilirəm ki, qalib mühitə və qalib mədəniyyətə qoşulmuşam. Mən məşqçilərdən və komanda yoldaşlarımdan öyrənmək istəyirəm və bu qalib komandanın dəyərli üzvü olmaq istəyirəm. Həqiqətən, mən işə başlamağı, digər oyunçularla görüşməyi və “Mançester Siti” azarkeşlərinə nə verə biləcəyimi göstərməyin intizarındayam”, deyə Marmuş vurğulayıb.
Marmuşun keçidi “Mançester Siti”yə 75 milyon avro məbləğ müqabilində başa gəlib. Misirli futbolçu İngiltərə klubu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb. Marmuş “şəhərlilər”in heyətində “7” nömrə altında çıxış edəcək.
Mərkəz hücumçusu olan Ömər Misirin “Vadi Deqla” klubunun yetirməsidir. Misirli futbolçu daha əvvəl “Volfsburq”, “Sankt Pauli”, “Ştutqart” və Frankfurt “Ayntraxt”ında çıxış edib.
Marmuş cari mövsümün birinci yarısında “Ayntraxt”ın heyətində 26 oyuna çıxıb, 20 qol vurub, 14 məhsuldar ötürmə müəllifi olub.
Marmuşun Frankfurt klubunda çıxışının ümumi mənzərəsi 67 oyun, 37 qol, 20 məhsuldar ötürməsən ibarətdir.
Ömər Marmuş 2021-ci ilin oktyabr ayında debüt etdiyi Misir yığmasının heyətində 35 oyuna çıxıb, 6 qol vurub, 3 məhsuldar ötürmə verib.
“Transfermarkt” internet-portalı 25 yaşlı misirli mərkəz hücumçusunun transfer dəyərini 60 milyon avro məbləğində qiymətləndirir.
