''Fənərbaxça'' bu ulduzu ''Qalatasaray''ın ovcunun içindən oğurladı!

''Qalatasaray''la çempionluq mübarizəsi aparan ''Fənərbaxça'' bir-birinin ardınca önəmli transferlər həyata keçirməkdədi.

''Football-plus.az'' xəbər verir ki, ''Aston Villa''lı Dieqo Karlosu nəhayət, İstanbula gətirməyə müvəffəq olan ''Fənər'' əsas ''bombanı'' çərşənbə günü partlatdı. Belə ki, ''sarı-lacivərdlilər'' uzun müddətdi, ''Qalatasaray''la danışıqlar aparan və məhz bu kluba keçəcəyi gözlənilən Milan Şkrinyarı transfer etdi!

Tanınmış slovakiyalı müdafiəçi son detalları razılaşdırmaq üçün yerli vaxtla saat 15.30-da İstanbula gəlib. Əslində PSJ-də baş məşqçi Luis Enrike ilə ulduzu barışmadığı üçün çox az oynayan və klubdan ayrılmaq istəyən 29 yaşlı futbolçu artıq ''Qalatasaray''la ilkin anlaşma əldə etmişdi. Amma iddialara inansaq, son anda Joze Mourinyo amili həlledici oldu. Ünlü portuqaliyalı mütəxəssis Şkrinyar ilə görüntülü danışaraq qısa müddət ərzində onu ''Fənərbaxça''ya gəlməyə razı saldı. Yəni komanda faktiki olaraq bu futbolçunu əzəli rəqibin ovcunun içindən oğurladı. Beləcə ''Fənər'' müdafiə xəttinə çox ciddi sərmayə yatırmış oldu. Çünki Dieqo Karlosun transferi kluba ən azı 11 milyon avroya başa gələcək.

Şkrinyarın keçidinin detalları bilinməsə də, ona görə də ən azı 10 milyon avro ödəniləcəyini proqnozlaşdırmaq olar. Bu futbolçunun ''transfermarkt''da dəyəri 15 milyon avrodu. Ceyden Oostervolde və Rodriqo Bekao kimi müdafiəçiləri mövsümün sonuna qədər itirən ''Fənər''in ilk növbədə müdafiəni gücləndirəcəyi gözlənilən idi.

Bundan başqa digər mərkəz müdafiəçisi, fanatlarla ulduzu barışmayan Samet Akaydının da tezliklə komandanı tərk edəcəyi bildirilir.

''İnter''də çıxış edərkən dünyanın ən güclü müdafiəçilərindən birinə çevrilən Şkrinyar 2023-dən Paris nəhəngində çıxış edir. 2023/24-də 32 rəsmi oyuna çıxan təcrübəli futbolçu məşqçi dəyişikliyindən sonra əsas heyətdəki yerini itirdi. Ona görə də bu mövsüm cəmi 5 oyuna çıxa bilib. Şkrinyar indiyə qədər karyerası ərzində 423 rəsmi oyuna çıxaraq aktivinə 25 qol, 7 məhsuldar ötürmə yazıb.

ƏLİ

• Transfer
• Fənərbaxça
• Qalatasaray
• İstanbul
• Dieqo Karlos