Alimlərin fikrincə, onlar bunu əvvəllər öyrənməyiblər.
QHT.az xəbər verir ki, Günəş sistemindən kənarda, Yerdən 500 işıq ili uzaqlıqda yerləşən WASP-127b qaz nəhəngi alimlərin diqqətini cəlb edib. "Maraqlı Mühəndislik" yazır ki, Yupiterdən daha böyük, lakin daha az kütləyə malik olan bu planet "boş" görünüşə sahibdir. Alimlər planetdə inanılmaz sürətli "fövqəlsəs küləkləri" aşkarlayıblar. Bu küləklərin sürəti saatda 33 min kilometrə çatır və planetin fırlanma sürətindən altı dəfə çoxdur. Göttingen Universitetindən Lisa Nortmann qeyd edir ki, atmosferin bir hissəsi bizə doğru, digəri isə uzaqlaşaraq reaktiv küləklər yaradır.
Bu küləklər Günəş sistemimizdə qeydə alınan ən sürətli küləkləri, o cümlədən Neptundakı 2 min km/saat sürətini xeyli üstələyir. Tədqiqatçılar həmçinin atmosferdə materialın hərəkətində "ikiqat zirvə" siqnalını aşkar ediblər ki, bu da küləklərin ekvator ətrafında dövr etməsi ilə əlaqələndirilir. Hava xəritəsində maraqlı temperatur fərqləri də müşahidə edilib: qütblər daha soyuq, səhər və axşam tərəfləri arasında nəzərəçarpan temperatur fərqi mövcuddur. Çin Elm və Texnologiya Universitetindən Fei Yan planetin Yer kimi mürəkkəb hava şəraitinə malik olduğunu vurğulayıb.
R.İmanov
