Dünya İqtisadi Forumunun 2025-ci il toplantısında Avropa Yenidənqurma və İnkişaf Bankı (AYİB) ilə Azərbaycan dövlətinin nümayəndələri tərəfindən razılaşdırılan üçüncü Yaşıl Şəhərlər layihəsi çərçivəsində 300 000-dən artıq əhalisi olan Azərbaycanın ikinci böyük şəhəri olan Gəncənin su təchizatı infrastrukturu yenilənəcək.
Davosda AYİB-in vitse-prezidenti Jürgen Rigterink və Azərbaycanın İqtisadiyyat Naziri Mikayıl Cabbarov tərəfindən imzalanan kredit razılaşmasına əsasən, adı çəkilən bank Gəncə şəhərində su təchizatı sisteminin yenilənməsi üçün 35 milyon avro maliyyə ayıracaq. Razılaşma AYİB-in prezidenti xanım Odile Renaud-Basso ilə Azərbaycanın prezidenti İlham Əliyev arasında keçirilən görüşdə imzalanıb. Avropa İttifaqı layihənin birgə maliyyələşdirilməsi üçün 5 milyon avroluq qrant yardımı ayıracaq.
Ayrılan maliyyə vəsaitləri su təchizatı sisteminin qurulması, boruların çəkilməsi, çirkli su kollektorlarının və su anbarlarının tikilməsi üçün sərf olunacaq. Gəncənin su təchizatı infrastrukturunun yenilənməsi şəhər sakinlərinə təmiz sudan istifadə etmək imkanı yaradacaq.
2020-ci ildə Gəncə AYİB-in flaqman Yaşıl Şəhərlər proqramına qoşulub və bu, AYİB-in bu şəhərdə maliyyələşdirdiyi üçüncü investisiya layihəsidir. Daha əvvəl şəhərdə tullantıların idarə edilməsi və işıqlandırma infrastrukturunun yenilənməsi layihələri maliyyələşdirilib.
AYİB-in 7 milyard avro büdcəyə malik Yaşıl Şəhərlər proqramı hər bir şəhərə ayrıca uyğunlaşdırılmış Yaşıl Şəhər Fəaliyyət Planı (GCAP) işləyib hazırlamaqla və hər bir şəhərin problemlərinin həlli üçün məqsədyönlü investisiyalar ayırmaqla həmin şəhərlərə ən aktual ekoloji problemləri müəyyən etməyə və həllinə kömək edir.
