Həkimlər bədii gimnastika üzrə Rusiya çempionu Lala Kramarenkonun zədəli əvəzinə sağlam meniskini çıxarıblar.
İdman.biz xəbər verir ki, bu barədə Rusiya millisinin baş məşqçisi İrina Viner “Youtube” kanalında Nadejda Streletsə müsahibəsində danışıb.
“Orada iki sümük var, biri zədəli, o biri sağlam idi. Cərrahiyyə əməliyyatı həyata edən həkim səhvən sağlamı çıxarıb. İndi o, İsraildə bir ay bəzi bərpa prosedurları keçirib, amma kəsiləni bərpa edə bilməzsən", - deyə Viner bildirib.
Lala 2024-cü ildə Rusiya çempionatında beş qızıl medal qazanıb, Kazanda keçirilən BRİKS Oyunlarında fərdi çoxnövçülükdə də qalib olub. O, həmçinin yeniyetmələr arasında üçqat dünya çempionu və 2021-ci ildə komanda hesabında Avropa çempionudur.
Lala Kramarenko 6 dekabr 2004-cü ildə Moskvada anadan olub. Onun atası məşhur azərbaycanlı futbolçu, Azərbaycan millisinin keçmiş qapıçısı, hazırda Moskvanın ÇSKA klubunun qapıçılar üzrə məşqçisi Dmitri Kramarenkodur.
İdman.biz
