“Turan Tovuz” komandası futbol üzrə Azərbaycan çempionatında “Şəmkir” və “Neftçi” klublarının göstəricisini təkrarlayıb.
Arena.az bu barədə Peşəkar Futbol Liqasının rəsmi saytına istinadən xəbər verir.
Bölgə təmsilçisi buna Azərbaycan Premyer Liqasının 2024/2025-ci illər mövsümünün 20-ci turunda “Qarabağ”a qalib gəlməklə (2:1) nail olub. Nəticədə Ağdam klubunun çempionatdakı məğlubiyyətsiz oyunlar seriyası qırılıb. 4-cü turun 2024-cü il avqustun 24-də keçirilmiş “Turan Tovuz”la ev matçında da 0:1 hesabı ilə uduzmuş “köhlən atlar” yenə eyni rəqibə məğlub olub
Ardıcıl 16 qarşılaşmadan xalla ayrılan ölkə çempionu yenə evdə yenilib. “Turan Tovuz” “Qarabağ”la eyni mövsümün hər iki səfər görüşündə 3 xal qazanan 3-cü komanda olub. 2001/2002-ci illər mövsümündə “Şəmkir” (3:1, 2:0), 2020/2021-ci illər mövsümündə “Neftçi” (2:1, 2:1) Ağdam klubunun meydanında 6 xal əldə edib.
Qeyd edək ki, ölkə çempionatları 2013/2014 mövsümündən 4 dövrədə keçirilir. Bunadək iki mərhələdə keçirilən 1998/1999, yarımçıq qalan 2001/2002 və 2009/2010, 2012/2013 mövsümlərində də bir komanda eyni rəqiblə iki dəfə səfərdə qarşılaşa bilib.
