İHH İnsani Yardım Vəqfinin, Türkiyə-Azərbaycan İş Adamları və Sənayeçiləri İctimai Birliyinin (TÜİB) və “Damla” İB-nin birgə təşkilatçılığı ilə çəkilən Hacı Zeynalabdin Tağıyevin həyatından bəhs edən “Tağıyev” sənədli filminin təqdimatı keçirilib.
Yenicag.az xəbər verir ki, Nizami Kino Mərkəzində keçirilən təqdimatda Azərbaycan Respublikası Milli Məclisinin deputatı Tənzilə Rüstəmxanlı, Ceyhun Məmmədov, Türkiyə və Azərbaycan İş Adamları və Sənayeçilər İctimai Birliyinin (TÜİB) sədri Hüseyn Büyükfırat, Türkiyə və Azərbaycanın ictimaiyyət və mədəniyyət nümayəndələri, media nümayəndələri və filmin yaradıcı heyəti iştirak ediblər.
Tədbirdə çıxış edən İnsani Yardım Vəqfinin nümayəndəsi Yavuz Dede bildirib ki, Hacı Zeynalabdin Tağıyev xeyriyyə işləri ilə, tikdirdiyi məktəblərlə və gənclərin təhsilinə dəstək olmaqla millətinin gələcəyi üçün böyük işlər görmüş tarixi şəxsiyyətdir. O qeyd edib ki, Hacı Zeynalabdin Tağıyevin əzmi bugünkü nəsillərə ən böyük örnəklərdən biridir.
Tədbirdə vurğulanıb ki, bu sənədli film yalnız Tağıyevin həyat və fəaliyyətindən bəhs etmir, eyni zamanda, cəmiyyətə xeyriyyəçilik ruhunu aşılayır.
Qeyd edək ki, “Tağıyev” filmi “Rumman” şirkətinin istehsalıdır. Filmin rejissoru M. Abdülqafur Şahindir. Çıxışlardan sonra film ictimaiyyətə təqdim edilib.
Məsimə Məmmədova
Samir Məcidov
