“Mançester Siti” bu ay sıralarına cəlb etməyi planlaşdırdığı bütün oyunçuların transferini rəsmiləşdirib. İngiltərə çempionunun aparıcı futbolçularından biri isə artıq klubun düşərgəsini tərk edib.
Əvvəlcə Özbəkistan yığmasının oyunçusu Abdukodir Xusanovun “Siti”yə keçidi rəsmiləşib. İngiltərə klubunun mətbuat xidmətinin məlumatına görə, 20 yaşlı mərkəz müdafiəçisi ilə müddəti 2029-cu ilin yayına qədər nəzərdə tutulan müqavilə imzalanıb. Abdukodir MS-yə “Lans”dan transfer olunub. İngiltərə klubunun gənc futbolçu üçün təxminən 40 milyon avro təzminat ödədiyi iddia olunur.
Vitor Reys də artıq MS-nin oyunçusu sayılır. Klubun rəsmi saytının məlumatına görə, 19 yaşlı braziliyalı müdafiəçi ilə 4,5 illik müqavilə imzalanıb. MS transfer üçün “Palmeyras”a 35 milyon avro ödəyib. Maraq üçün Vitorun san paululuların əsas komandasında ötən ilin yayından oynadığını, meydana çıxdığı 22 oyunda 2 qol vurduğunu qeyd edək.
“Siti” “Ayntraxt”dan (Frankfurt) Omar Marmuşun transferini də açıqlayıb. Misirli yarımmüdafiəçi yeni klubuna 75 milyon avroya başa gəlib. 25 yaşlı futbolçunun MS ilə bağladığı müqavilənin müddəti 4,5 illiyə nəzərdə tutulub. Omar bu mövsüm bundesliqada meydana çıxdığı 17 matçda 15 qolun və 10 məhsuldar ötürmənin müəllifi olub. Onun Misir yığmasındakı göstəriciləri isə uyğun olaraq 35-ə, 6-ya və 3-ə bərabərdi.
Əlavə edək ki, Kayl Uokerin “Milan”a gözlənilən keçidi tezliklə rəsmiləşəcək. İtaliya klubunun rəhbərliyi artıq təcrübəli futbolçu ilə anlaşıb. İnsayder Fabritsio Romanonun məlumatına görə, Kayl İtaliya klubuna icarə əsasında keçəcək.
Müqavilədə onu yayda birdəfəlik transfer etmək imkanı ilə bağlı bənd də var. 34 yaşlı futbolçu yeni klubunda bu həftə tibbi müayinədən keçəcək. Uolker MS-də 2017-ci ildən çıxış edir. O, bu mövsüm komandanın 18 oyununda iştirak edib.
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
