Avropa Yenidənqurma və İnkişaf Bankı (EBRD) 2024-cü ildə Azərbaycanda 8 layihəyə 196 milyon avro investisiya edib.
"Ölkə.az" xəbər verir ki, bu investisiyaların 82 %-i ölkənin "yaşıl iqtisadiyyatı"na - enerji və nəqliyyat sektorları, maliyyə institutları, kiçik və orta müəssisələri (KOB) kimi müxtəlif sektorlara yönəldilib.
EBRD, Azərbaycanın karbonsuzlaşdırma hədəflərini dəstəkləyən əsas tərəfdaşlardan biri olub. Bakıda keçirilən Birləşmiş Millətlər Təşkilatının İqlim Dəyişikliyi Konfransı (COP29) zamanı Bank, Qafqazda ən böyük kommunal miqyaslı günəş elektrik stansiyalarının tikintisini birgə maliyyələşdirib və hazırda Azərbaycanda maliyyələşdirilən bərpa olunan enerjinin həcmi 1,2 giqavatı ötüb.
EBRD, Azərbaycana ilk dəfə bərpa olunan enerji auksionunun keçirilməsində dəstək göstərib və nəticə COP29-da elan edilib. Nəticədə, Azərbaycanın enerji bazarının yeni iştirakçısı Qaradağ rayonunda 100 meqavatlıq günəş elektrik stansiyasının istismara verilməsi istiqamətində işə başlayacaq.
Bank, həmçinin Azərbaycanın ticarət donanmasının fəaliyyətinin genişləndirilməsi üçün Azərbaycan Xəzər Dəniz Gəmiçiliyinə (ASCO) 42 milyon ABŞ dolları (38,71 milyon avro) kredit ayıraraq ölkənin nəqliyyat potensialına investisiya yatırıb.
2024-cü ildə EBRD, Azərbaycan Beynəlxalq Bankı ilə əməkdaşlıq edərək, ticarətin maliyyələşdirilməsi limitini 50 milyon ABŞ dollarına (46,7 milyon avro) qədər təsdiqləyib. Bu mexanizm, EBRD-nin Ticarətin Asanlaşdırılması Proqramı (TFP) vasitəsilə Azərbaycan şirkətlərinin ixrac və idxal əməliyyatlarını dəstəkləmək və onların qlobal bazarlara inteqrasiyasına kömək etmək məqsədi daşıyır.
Azərbaycanda fəaliyyət göstərən KOB-lar da EBRD-nin aktiv fəaliyyətinin əhəmiyyətli benefisiarları olub. İl ərzində və Avropa İttifaqının donor dəstəyi ilə Bank, yerli bizneslərə kredit üçün "AccessBank" və "Bank Respublika"ya böyük məbləğdə kredit verib. EBRD, həmçinin "AccessBank" ilə imzaladığı 15 milyon avro dəyərində yeni vəsaitlə Azərbaycanda Risk Bölüşdürmə Mexanizmini yenidən işə salıb.
Yerli bizneslər də Bankın ticarət nişanı olan Kiçik Bizneslər üçün Məsləhət Proqramından faydalanıblar.
“Ötən il, Azərbaycanda bizim üçün çox məhsuldar il oldu. Biz bütün prioritet investisiya sahələrini təqdim etdik. Biz 1,2 giqavat maliyyələşdirilmiş bərpa olunan enerji potensialını ötdük, ölkənin nəqliyyat potensialını maliyyələşdirdik və yeni və mövcud yerli tərəfdaş banklar vasitəsilə yerli biznesi dəstəklədik. Əldə olunan nəticələrə əsasən inanıram ki, əməkdaşlığımız növbəti illərdə də davam edəcək”, - EBRD-nin Azərbaycan üzrə rəhbəri Natali Mouravidze qeyd edib.
Qeyd edək ki, EBRD, Azərbaycanda aparıcı institusional investordur və burada 195 layihəyə 4 milyard avrodan çox sərmayə qoyub. Bankın ölkədəki strategiyası, Azərbaycana iqtisadiyyatını şaxələndirməyə və qeyri-neft özəl sektorunu inkişaf etdirməyə kömək etməkdən ibarətdir.
