Bu gün Bakının Yeni Günəşli qəsəbəsində zəncirvari yol qəzası olub.
“Qafqazinfo” xəbər verir ki, hadisə vaxtı eyni istiqamətdə hərəkət edən 2 marşrut avtobusu və 2 minik avtomobili toqquşub. Nəticədə qəzaya uğrayan avtobuslar yoldan çıxaraq səkiyə doğru istiqamətləniblər.
Bildirilir ki, hadisə 50 saylı marşrut xətti üzrə eyni istiqamətdə hərəkət edən avtobuslar ötüşərkən baş verib.
Hadisə yerinə polis əməkdaşları cəlb edilib.
***
50 saylı marşrut xəttini istismar edən Vətən.az M MC-dən saytımıza bildirilib ki, hadisə minik avtomobilinin avtobusun qarşısına qəfil çıxması nəticəsində baş verib:
“Nəqliyyat vasitələrinə ciddi ziyan dəyməyib və hadisə vaxtı xəsarət alan olmayıb”.
***
Bakı Şəhər Dövlət Yol Polisi İdarəsinin (BŞDYPİ) baş inspektoru Rüstəm Əhmədli açıqlamasında bildirib ki, hadisə bu gün saat 14:00-da baş verib:
“İlkin məlumata əsasən, hadisə nəticəsində altı nəqliyyat vasitəsinə ziyan dəyib. Belə ki, 50 nömrəli xətt üzrə hərəkət edən avtobus digər beş nəqliyyat vasitəsinə çırpılıb. Hadisə nəticəsində bir nəfər xəsarət alıb”.
