Berlin, 29 yanvar, AZƏRTAC
UEFA Çempionlar Liqası çərçivəsində bu gün oynanılan “Ştutqart” – “PSJ” qarşılaşmasından sonra iğtişaş törətmək istəyən 59 fransalı azarkeş saxlanılıb.
AZƏRTAC xəbər verir ki, fransalı azarkeşlərin stadiona biletsiz daxil olmağı və “Ştutqart” tərəfdarları ilə kütləvi dava etməyi planlaşdırdıqları müəyyənləşdirilib. Polis fransalı azarkeşləri hotellərdə və qatar stansiyalarında yaxalayıb. Onların sabah səhərə qədər nəzarət altında saxlanılacağı bildirilib.
Bununla yanaşı, fransalı azarkeşlərə hücum etməyi planlaşdıran 50-dək “Ştutqart” tərəfdarının şəhər mərkəzinə və stadionun ətrafına yaxınlaşmasının qarşısı alınıb.
Oyunun keçirildiyi müddətdə isə nəzarət tədbirləri daha da gücləndirilib.
Elvin Mövsüm
AZƏRTAC-ın xüsusi müxbiri
Berlin
