Mikroblar hər il dünyada 250 milyon ton dəm qazını zərərsizləşdirir.
Publika.az xəbər verir ki, Monaş Universiteti ilə Melburn Universitetinin avstraliyalı alimləri mikrobların hər il atmosferə atılan 2 milyard tondan çox təhlükəli çirkləndirici olan karbonmonoksitə (CO) qarşı təsirli vasitə olduğunu müəyyən ediblər.
Belə ki, mikroblar il ərzində 250 milyon ton karbonmonoksiti zərərsizləşdirən mexanizmə sahibdirlər.
Tədqiqat "Nature Chemical Biology" elmi jurnalında dərc olunub.
Bildirilir ki, bu prosesdə əsas rolu mikroblara karbonmonoksitdən enerji çıxarmağa imkan verən CO dehidrogenaz fermenti oynayır.
“Bu mikroorqanizmlər görünməz ekosistem mühəndisləri kimi fəaliyyət göstərir. Onlar zərərli qazı hüceyrələri üçün faydalı bir mənbəyə çevirirlər", - deyə Monaş Biotibbi Kəşf İnstitutundan tədqiqatın həmmüəllifi Eşli Kropp bildirib.
Alimlər fermentin atmosferdən "CO" molekullarını tutaraq atom səviyyəsində işlədiyini aşkar ediblər. Bu mexanizm torpaqda və su hövzələrində trilyonlarla mikrob tərəfindən istifadə edilir və onları qlobal təbii “süzgəc”ə çevirir.
