“Biz istəyirik və inanırıq ki, Avropa Liqasını qazana bilərik. "Niyə də olmasın?!"
Teleqraf.com Yunanıstan mətbuatına istinadən xəbər verir ki, bu sözləri UEFA Avropa Liqasının VIII turunda “Qarabağ”ı 3:0 hesabla məğlub edən “Olimpiakos”un mərakeşli futbolçusu El Kaabi deyib.
Azərbaycan çempionunun qapısından 2 qol keçirən 32 yaşlı oyunçu əldə etdikləri qələbəni belə şərh edib: “Böyük əmək sərf etdik və vacib qələbə qazandıq. Hər oyuna fərdi baxırıq. “Qarabağ” ilk hissədə pis deyildi. Amma biz üstünlüyü ələ alaraq qollar vurduq. “Olimpiakos” keyfiyyətli oyunçuları və inanılmaz azarkeş izdihamı olan böyük və tarixi komandadır”.
Qeyd edək ki, “Qarabağ” Avropa Liqasının VIII turunda Yunanıstanın “Olimpiakos” klubuna uduzmaqla 7-ci məğlubiyyətini alaraq turnirdə iştirakını dayandırdı. Ötən il UEFA Konfrans Liqasının qalibi olan Pirey təmsilçisi isə 7-ci pillədə birbaşa 1/8 final mərhələsinə vəsiqə qazandı.
