Amerikanın yeni administrasiyası başa düşür ki, Rusiya-Ukrayna müharibəsinə son qoymaq üçün Rusiyaya təzyiq göstərmək lazımdır...
Poliqon xəbər verir ki, bunu DW-yə müsahibəsində Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas deyib.
"Amerikalılar başa düşürlər ki, bu müharibəni bitirmək üçün biz Rusiyaya təzyiq göstərməliyik, çünki bu müharibəni başlayan Rusiya olub", deyə Kallas qeyd edib.
O, həmçinin ABŞ prezidenti Donald Trampın Rusiya ilə bağlı sərt mövqeyini qeyd edib.
"Prezident Tramp Putinlə bağlı açıqlamalarında çox sərt olub. Məncə, biz şəkli təxminən eyni şəkildə görürük", deyə Kallas vurğulayıb.
Onun sözlərinə görə, hamı bu müharibəni bitirmək istəyir, lakin sülh davamlı olmalıdır:
"Hamı bu müharibəni bitirmək istəyir, çünki hamı sülh istəyir. Ancaq bu da aydındır və bunu ABŞ dövlət katibi Marko Rubio da deyib ki, sülh davamlı olmalıdır".
Qeyd edək ki, ABŞ prezidenti Donald Tramp Rusiya xalqını sevdiyini və Rusiyaya zərər vermək istəmədiyini, lakin Moskva sülh sazişi imzalamasa, Rusiyadan gələn mallara yüksək vergilər, tariflər və sanksiyalar tətbiq etməkdən başqa çarəsinin qalmayacağını bildirib.
Poliqon.info
