“Mançester Siti”nin baş məşqçisi Xosep Qvardiola futbol klubu satın almaqda maraqlı olub-olmaması ilə bağlı sualı cavablayıb.
Arena.az “Mançester Siti”nin rəsmi saytına istinadən, ispan mütəxəssisin bu barədə cavabını təqdim edir:
“Bəzən mən yaxşı məşqçiyəm, amma bir iş adamı kimi mən heç də yaxşı deyiləm. Mənə bu, maraqlı deyil”, deyə “Pep” vurğulayıb.
Xosep Qvardiola “Mançester Siti”ni 2016-cı ilin iyul ayından çalışdırır. İspan mütəxəssisin “Mançester Siti” ilə müqaviləsinin müddəti 2027-ci ilin iyun ayının sonuna qədər qüvvədədir.
“Şəhərlilər” bu müddətdə “Pep”in rəhbərliyi altında 501 oyun keçiriblər, 363 qələbə qazanıblar, 63 heç-heçə ediblər, 75 məğlubiyyətə üzülüblər. Top fərqi isə 1256:465 nisbətindədir.
Bu müddətdə “Pep” “Mançester Siti”nin futbol tarixinin ən şanlı salnaməsini yaradıb. Qvardiola “şəhərlilər”ə 6 dəfə İngiltərə Premyer Liqasını, 2 dəfə İngiltərə Kubokunu, 4 dəfə İngiltərə Liqa Kubokunu, 3 dəfə İngiltərə Super Kubokunu, UEFA Çempionlar Liqasını, UEFA Super Kubokunu və FIFA Klub Dünya Kubokunu qazandırıb.
Xatırladaq ki, Xosep Qvardiola “Mançester Siti”dən öncə “Barselona” və “Bayern”i də uğurla çalışdırıb, bu komandaların hər birinə çoxlu qənimətlər qazandırıb.
20 oyundan 34 xalla “Mançestet Siti” İngiltərə Premyer Liqasının yarış cədvəlinin 6-cı pilləsində qərarlaşıb.
