İtaliyanın “Leççe” klubunun mərkəz yarımmüdafiəçisi Luis Hasa bundan sonra “Napoli”nin uğurları üçün çalışacaq.
Arena.az xəbər verir ki, bu barədə Neapol klubunun rəsmi saytı məlumat yayıb.
“Napoli” bu transferə görə “Leççe”yə 500 min avro ödəyib. 21 yaşlı futbolçu ilə müddəti 2029-cu ilin 30 iyununa qədər müqavilə imzalanıb.
Əslən Albaniyadan olan italiyalı futbolçu “Yuventus”un yetirməsidir. O, 2024-cü ilin avqustunda 150 min avro müqabilində “Leççe”yə keçmişdi. Yarımmüdafiəçi bu komandanın heyətində cəmi 1 oyunda meydana çıxıb.
“Napoli” iki futbolçusu ilə də yollarını ayırıb. Daha doğrusu, Neapol klubu mərkəz yarımmüdafiəçi Maykl Folorunşonu “Fiorentina”ya, hücumçusu Lorenso Sqarbini də “Yuve Stabiya”ya icarəyə verib. Hər iki oyunçu bu mövsümün sonunadək icarədə olacaq. Sadəcə, “Fiorentina” bu mövsümün sonunadək Folorunşonun transfer hüquqlarını da almaq hüququna malikdir.
Lorenso Sqarbi futbola “Südtirol”da başlasa da, “Napoli”nin yetirməsi hesab olunur. Amma o, Neapol klubunun əsas komandasında debüt şansı qazanmayıb. Bu üzdən də 23 yaşlı italiyalı forvard “Seqnaqo Salus”, “Renate”, “Pro Sesto”, “Avellino” və “Bari” kimi klublarda icarədə oynamaq məcburiyyətində qalıb. O, İtaliyanın U-18 yığmasında da oynayıb.
Maykl Folorunşo isə “Savio” və “Latsio” klublarının yetirməsidir. 26 yaşlı yarımmüdafiəçi “Virtus Frankavilla”, “Bari”, “Recina”, “Pordenone”, “Verona” kimi klublarda icarədə olub. 2019-cu ildən “Napoli”də olan italyan futbolçu bu klubun əsas komandasında cəmi 7 oyuna çıxıb. Folorunşo 2024-cü ilin iyun ayında debüt etdiyi İtaliya millisində də 2 oyuna çıxıb.
Yeri gəlmişkən, Folorunşonu heyətinə qatmış “Fiorentina” da mərkəz müdafiəçisi Lukas Martines Kuartanı “River Pleyt”ə satıb. Florensiya klubu bu satışdan 7 milyon avro qazanıb.
Kuarta məhz “River Pleyt”in yetirməsidir. O, “Fiorentina”ya 2020-ci ildə məhz Argentina klubundan gəlmişdi. 28 yaşlı yarımmüdafiəçi İtaliya təmsilçisinin heyətində 142 oyuna çıxıb, 15 qol və 5 məhsuldar ötürmə müəllifi olub.
Lukas Martines 2019-cu ilin sentyabr ayında debüt etdiyi Argentina millisinin heyətində 15 oyun keçirib.
