Bakı, TurkicWorld
Azərbaycan Dövlət Diaspor Komitəsinin sədri Fuad Muradov İstanbulda keçirilən Türkiyə - Azərbaycan Dərnəkləri Federasiyasının (TADEF) 7-ci Hesabat - Seçki Konqresində iştirak edib.
TurkicWorld xəbər verir ki, görüşdə həmçinin MHP Samsun millət vəkili İlyas Topsakal, İctimai Diplomatiya və İqtisadi Əməkdaşlıq Təşkilatının (İDİET) sədri Seyfullah Türksoy və Türkiyə Azərbaycan Mədəniyyət və Həmrəylik Dərnəyinin (İS-TAD) sədri Səfər Karakoyunlu iştirak edib.
Azərbaycan Dövlət Diaspor Komitəsinin sədri Fuad Muradov çıxışında qurultayın uğurlu təşkilinə görə TADEF-ə üzv olan birliklərin üzvlərini təbrik edib, yeni seçilən İdarə Heyətinə fəaliyyətlərində uğurlar arzulayıb.
“Bu gün Türkiyə Azərbaycan icması üçün çox mühüm bir gündür. TADEF-in idarə heyətinin yeni üzvləri seçilib. Türkiyə Azərbaycan üçün qardaş ölkədir. Bizim əsas məqsədimiz təbii ki, assosiasiyalarımızın daha səmərəli fəaliyyət göstərməsidir. Biz həm diaspor, həm də TADEF olaraq müxtəlif tədbirlər həyata keçirmişik.",-deyə Fuad Muradov bildirib.
Qeyd edək ki, iki gün davam edən konqresdə 24 TADEF üzvü assosiasiyanı təmsil edən 106 nümayəndədən 90-ı iştirak edib. Hakim Turan yekdilliklə növbəti müddətə TADEF-in prezidenti seçilib. Türkiyə və Azərbaycanın dövlət himnlərinin səsləndirilməsi ilə başlayan tədbirdə hər iki ölkənin şəhidlərinin xatirəsi yad edilib.
