24 yanvar Azərbaycan Silahlı Qüvvələrinin baş leytenantı, İkinci Qarabağ müharibəsi şəhidi, Vətən Müharibəsi Qəhrəmanı Azad Hümbətovun doğum günüdür.Missiya.Az xəbər verir ki, o, 1996-cı ildə Bakıda dünyaya gəlib.İgidimiz əslən Göyçə mahalının Aşağı Şorca kəndindəndir. Nərimanov rayonundakı Bakı şəhəri 291 №-li ekologiya liseyini bitirib. 2013-cü ildə Heydər Əliyev adına Azərbaycan Ali Hərbi Məktəbinin tank bölüyü ixtisasına daxil olub, 2017-ci ildə həmin məktəbi leytenant hərbi rütbəsi ilə bitirib. Təyinatı üzrə elə həmin ildən Füzuli rayonunun Horadiz şəhərindəki N saylı hərbi hissədə öz vəzifəsinə başlayıb.2018-ci il "Azərbaycan Ordusunun 100 illiyi" münasibətilə keçirilən hərbi tədbirdə ön sırada bayraqdar vəzifəsini daşıyıb. Həmçinin, o "Azərbaycan Ordusunun 100 illiyi (1918–2018)" yubiley medalı ilə təltif olunub. Azad Hümbətov peşəkarlığını artırmaq üçün Bakıda yerləşən Silahlı qüvvələrin təlim və tədris mərkəzində 45 gün müddətində zabit heyətinin təkmilləşdirmə kursunu keçərək baş leytenant rütbəsi alıb. İkinci Qarabağ müharibəsində iştirakı Azad Hümbətov Füzuli, Qubadlı, Laçın istiqamətlərində gedən döyüşlərdə iştirak edib. Tank taqımı komandiri olmuş qəhrəmanımız öz həyatını təhlükəyə ataraq düşmənin 5 tankını öz mövqelərimizə gətirib çıxarıb və dəfələrlə öz döyüş yoldaşlarını düşmən mühasirəsindən yaralı halda çıxara bilib.Müharibənin yeni başladığı dövrdə o, tankda minaya düşüb, ayağından yaralanıb. Tankı idarə edən mexanikinin daha ağır xəsarətlər aldığını gördükdə isə onu yaralı halda 25 km meşə ərazisində belində daşıyaraq 2 gündən sonra öz döyüş postlarına gətirib çıxarıb. Bundan sonra Azadı Beyləqanda hospitala müalicə üçün göndəriblər. O, burada müalicəsini yarımçıq qoyaraq yenidən döyüş meydanına qayıdıb. Ailəsi isə onun yaralı vəziyyətdə olmasından, müalicəsini yarımçıq qoyub yenidən döyüş meydanına qayıtmasından yalnız şəhid olandan sonra xəbər tutub. Onu da qeyd edək ki, döyüşlər zamanı rəhbəri olduğu tank bölüyündən, ona ehtiyac olan piyada döyüş bölüyünə rəhbər təyin edilib. 27 oktyabr 2020-ci ildə Laçın uğrunda gedən döyüşlərdə şəhadətə ucalıb. İkinci Fəxri Xiyabanda dəfn olunub. Şəhidimizə məxsus materiallar ailəsi tərəfindən Milli Azərbaycan Tarixi Muzeyinin İkinci Qarabağ müharibəsi fonduna təhvil verilib.
Allah cəsur övladımıza rəhmət eləsin!
Zərintac MayisqızıMissiya.Az
