ABŞ və İsrail dəli olmalıdır ki, İranın nüvə obyektlərinə hücum etsin. Bu, bölgə üçün pis bir fəlakət olacaq.
APA xəbər verir ki, bunu İranın xarici işlər naziri Abbas Araqçi “Sky News”a müsahibəsində bildirib.
Nazir ABŞ və İsrailin İranın nüvə obyektlərinə hücumunun region üçün çox pis fəlakət olacağını vurğulayıb: “Biz açıq şəkildə bildirdik ki, nüvə obyektlərimizə edilən istənilən hücum dərhal və qətiyyətli cavabla üzləşəcək. Amma mən onların belə bir dəlilik edəcəklərini düşünmürəm. Bu, həqiqətən də dəlilik olar. Bu, bütün bölgəni çox pis bir fəlakətə sürükləyəcək”.
ABŞ-la yeni danışıqların mümkünlüyünə toxunan Araqçi deyib ki, İran Trampın təkliflərini dinləməyə hazır olsa da, yeni danışıqlara başlamağa razı olmaq üçün şərtlər keçmişdən xeyli fərqli və daha çətindir.
Araqçi Donald Trampın fələstinlilərin Qəzzadan təxliyəsi ilə bağlı açıqlamalarına da münasibət bildirib: “Mənim təklifim fələstinlilərin yerinə israillilərin deportasiya edilməsi və onları Qrenlandiyaya göndərərək bir daşla iki quş vurmaqdır”.
İran xarici işlər naziri HAMAS və Hizbullahın son vəziyyətindən də danışıb. Nazir qruplaşmaların zəiflədiyini etiraf edib: “HAMAS və Hizbullah zərər görüb, lakin eyni zamanda, özlərini yenidən qururlar”.
