Nyu Cersi ştatının keçmiş senatoru Bob Menendez ABŞ-da rüşvətxorluq və korrupsiya ittihamları ilə münsiflər heyəti tərəfindən təqsirli bilinərək 11 il müddətinə azadlıqdan məhrum edilib.
Hakim Sidney Stein Manhettendə federal məhkəmədə keçirilən iclasda Menendezin hökmünü elan edib.
Prokurorlar bildiriblər ki, Menendez səlahiyyətlərindən Qətər hökumətinə yardım etmək və Misirin xeyrinə istifadə etmək müqabilində rüşvət alıb.
Menendezin evində zərflərdə və paltolarda gizlədilmiş 480 min dollardan çox pul və dəyəri 100 min dollardan çox olan qızıl külçələr tapılıb.
Hakim Stein bildirib ki, Menendez yüksək vəzifəsindən istifadə edərək qızıl külçələri, nağd pullar, lüks avtomobillər və digər rüşvətlər, o cümlədən xarici ölkələrə işləmək üçün istifadə etdiyi üçün 11 il həbs cəzasına məhkum edilib.
“Uğurlu idin, qüdrətli idin, siyasi sistemimizin zirvəsində dayanırdın. Hardasa yolunu azdın və ictimai rifah üçün çalışmaq əvəzinə öz xeyrin üçün işləməyə başladın. Üzr istəyirəm, amma sən korrupsioner siyasətçi oldun”, – Stein bildirib.
71 yaşlı Menendez həbs cəzasına məhkum edilərkən göz yaşlarını salfetlə silərək, "Hörmətli, qarşınızda nizam-intizamlı bir insan var. Mən bütün həyatımı başqalarına xidmət etməyə həsr etmişəm. Mən mükəmməl olmaqdan uzaq adamam. Amma mən yarım əsrlik dövlət qulluğuma inanıram, pislikdən çox yaxşılıq etmişəm”, – deyib.
11 illik həbs cəzası ilə Menendez ABŞ tarixində ən uzun həbs cəzası alan keçmiş senator oldu.
O, korrupsiya və rüşvətxorluq ittihamı ilə təqsirli bilinib
ABŞ-da rüşvət və korrupsiya ittihamı ilə mühakimə olunan Senatın Xarici Əlaqələr Komitəsinin keçmiş sədri və Nyu Cersi senatoru Menendez 16 iyul 2024-cü ildə Nyu-York məhkəməsinin münsiflər heyəti tərəfindən təqsirli bilinib.
Münsiflər heyəti Menendezi rüşvət almaq, onun hərəkətlərinin araşdırılmasına təzyiq göstərməklə ədalət mühakiməsinə mane olmaq və xarici fəaliyyətlə məşğul olmaq da daxil olmaqla, bütün 16 maddə üzrə təqsirli bilib.
Münsiflər heyəti tərəfindən təqsirli bilindikdən sonra Menendez 21 avqust 2024-cü ildə ABŞ Senatında 18 il, 7 ay və 4 gün olmaqla Nyu Cersi tarixində dördüncü ən uzun senator olaraq vəzifəsindən istefa verməyə məcbur oldu.
Kubalı mühacirlərin oğlu Menendez ABŞ Konqresində Türkiyə əleyhinə mövqeyi, yunan və erməni lobbilərinə yaxınlığı ilə tanınırdı. Belə ki, Menendez “F-16”ların ABŞ-dan Türkiyəyə satışına qarşı çıxanlardan biri olub. Türkiyənin Aralıq dənizi və Egeydəki siyasətlərindən narahatlığını hər fürsətdə gündəmə gətirirdi.
