"Azərbaycan səhiyyəsində ciddi islahatlar həyata keçirilir. Ölkəmizdə icbari tibbi sığorta bütövlüklə həyata keçirilir. Səhiyyə sahəsinə ayrılan vəsait də ilbəil artır".
Modern.az xəbər verir ki, bunu Milli Məclisin Səhiyyə komitəsinin iclasında "İlkin səhiyyə xidməti: mövcud vəziyyət, görülən işlər, problemlər və onların həlli yolları” mövzusunda ictimai dinləmədə komitənin sədri Əhliman Əmiraslanov deyib.
Onun sözlərinə görə, ölkəmizdə əhaliyə göstərilən tibbi xidmətin yaxşılaşdırılmasında Birinci vitse-prezident Mehriban Əliyevanın rəhbərlik etdiyi Heydər Əliyev Fondu da böyük işlər görür:
“İcbari tibbi sığortanın tətbiqində uğurlardan danışmaqla bərabər nəzərə almaq lazımdır ki, əhalinin icbari tibbi sığortadan gözləntiləri böyükdür. Hələ də bir çox xəstəliklərin icbari tibbi sığorta ilə əhatə olunmaması əhalinin haqlı narazılığına səbəb olur. Bu gün müzakirə etdiyimiz ilkin səhiyyə xidmətinin yaxşılaşdırılması üçün də xeyli işlər görülür. Ancaq bu sahənin xüsusilə bölgələrimizdə ciddi təkmilləşməyə və islahatlara ehtiyacı var".
