Çıxış yolunu polisə müraciət etməkdə görən qadın, sığınacaq mərkəzinə yerləşdirilib
Həyat yoldaşının şiddətinə dözə bilməyən qadın sığınacağa yerləşdirilib.
Bizim.Media xəbər verir ki, “Təmiz Dünya” Qadınlara Yardım İctimai Birliyinin rəhbəri Mehriban Zeynalova bununla bağlı sosial şəbəkə hesabında paylaşım edib.
O, bildirib ki, iki övladı ilə sığınacağa yerləşdirilən qadın həyat yoldaşı tərəfindən dilənçiliyə məcbur edilib:
“Həyat yoldaşı qadından tələb edib ki, insanlardan pul toplayıb evə gətirsin. Qadın artıq buna dözə bilmədiyini bildirib. O, qeyd edib ki, həyat yoldaşına dəfələrlə işləməsini tövsiyə etsə də, yoldaşı “bizim nəsildə heç kim işləmir” deyərək evin dolanışığını təmin etmə məsuliyyətindən qaçıb. Bu səbəbdən qadın, insanlardan yardım istəyərək övladlarına və ailəsinə baxmaq məcburiyyətində qalıb. Nəticədə, çıxış yolunu polisə müraciət etməkdə görüb. Polis, ana və övladlarını qida ilə təmin etdikdən sonra onları sığınacağımıza yerləşdirib”.
Mehriban Zeynalova onu da vurğulayıb ki, qadın oxuma-yazma bilmir. Üstəlik qeyri-rəsmi nikahda olduğu şəxs uşaqlarına atalıq hüququ da tanımayıb.
Aygün Hüseyn, Bizim.Media
