Fövqəladə Hallar Nazirliyinin (FHN) “112” qaynar telefon xəttinə Sumqayıt şəhəri, Sülh küçəsində minik avtomobilində yanğın baş verməsi barədə məlumat daxil olub.
Senzor.az bildirir ki, bu barədə FHN məlumat yayıb.
Qeyd olunub ki, məlumatla əlaqədar dərhal FHN-in Dövlət Yanğından Mühafizə Xidmətinin Sumqayıt şəhər Yanğından Mühafizə İdarəsinin qüvvələri hadisə yerinə cəlb olunub. Hadisə yerində əməliyyat şəraiti qiymətləndirilərkən “Kia Cadenza” markalı minik avtomobili ilə “Hyundai Elantra” markalı minik avtomobilinin toqquşması nəticəsində yanğınla nəticələnən yol-qəza hadisəsinin baş verdiyi müəyyən olunub. Yanğınsöndürənlər tərəfindən “Kia Cadenza” markalı minik avtomobilində baş vermiş yanğın qısa müddətdə söndürülüb. Yanğın nəticəsində avtomobilin salonu və mühərrik hissəsi yanıb. Avtomobilin qalan hissəsi yanğından mühafizə olunub.
Qəza nəticəsində iki nəfər aldıqları bədən xəsarətlərindən vəfat edib, daha 3 nəfər isə xəsarət alıb.
“Report”un məlumatına görə, yaralılar Sumqayıt Tibb Mərkəzinin Təcili Tibbi Yardım Xəstəxanasına hospitalizasiya olunublar. Onlardan bir nəfər Reanimasiya şöbəsinə yerləşdirilib, vəziyyəti ağırdır.
Digər iki nəfərə isə Təcili yardım şöbəsində zəruri tibbi yardımlar göstərilir, vəziyyətləri orta-ağırdır.
Bu arada hadisə zamanı ölənlərin şəxsiyyəti də məlum olub. Onlardan birinin 1960-cı il təvəllüdlü Mehtiyev Yavər Əjdər oğlu olduğu bildirilir. Qəza nəticəsində ölən digər şəxs isə Ceyranbatan qəsəbə sakini, 2003-cü il təvəllüdlü piyada Paşayev İntiqam Qalib oğludur. Hadisə baş verən anda o, yolu keçməl istəyirmiş...
Hadisə ilə əlaqədar aidiyyəti qurumlar tərəfindən araşdırma aparılır.
