Dünya liderləri ABŞ Prezidenti Donald Tramp vəzifəsinə başlaması münasibətilə təbrik ediblər.
Bakıvaxtı.az xəbər verir ki, onlar bu barədə “X” hesablarında yazıblar.
Finlandiya Prezidenti Aleksandr Stubb bildirib ki, ABŞ ölkəsinin əsas strateji tərəfdaşı və müttəfiqidir. O, Trampın hakimiyyəti dövründə əməkdaşlığı səbrsizliklə gözlədiyini diqqətə çatdırıb.
Moldova Prezidenti Maya Sandu ikitərəfli münasibətləri yüksək qiymətləndirdiyini vurğulayıb: “Hər iki xalq üçün təhlükəsizlik, enerji əməkdaşlığı və rifahı gücləndirmək üçün birgə işləməyi səbirsizliklə gözləyirik”.
İtaliyanın Baş naziri Corciya Meloni yeni prezidentə ən xoş arzularını çatdırıb: “Əminəm ki, xalqlarımız arasındakı dostluq, habelə bizi birləşdirən dəyərlər İtaliya ilə ABŞ arasında əməkdaşlığı gücləndirməyə, qlobal çağırışlarla birlikdə üzləşməyə və xalqlarımız üçün firavanlıq, təhlükəsizlik gələcəyini qurmağa davam edəcək”.
Baş nazirin sözlərinə görə, İtaliya ABŞ və Avropa arasında dialoqun möhkəmləndirilməsinə sadiq qalacaq.
Gürcüstan Baş naziri İrakli Kobaxidze Trampa uğurlar arzulayıb: “Onun rəhbərliyi altında ABŞ qlobal sülhü təşviq etməli və Gürcüstanla ikitərəfli münasibətləri gücləndirməlidir”.
Çexiya Baş naziri Petr Fiala qeyd edib ki, ABŞ həm təhlükəsizlik, həm də ticarət sahəsində ölkəsinin əsas müttəfiqidir: “Əminəm ki, Prezident Tramp və onun yeni administrasiyası ilə birlikdə bu əlaqələri uğurla inkişaf etdirməyə davam edəcəyik”.
Misir Prezidenti Əbülfəttah Əl-Sisi də Tramp vəzifəyə başlaması münasibətilə ilk təbrik edənlərdən olub: “Mən ölkələrimiz arasında strateji münasibətlərin genişləndirilməsi və hər iki xalqın mənafeyinə, regionumuzda və dünyada təhlükəsizlik və sabitliyin möhkəmləndirilməsinə xidmət edən ümumi maraqlarımıza nail olmaq üçün Zati-aliləri ilə işləməyə, həmçinin əməkdaşlığı davam etdirməyə sadiqliyimizi təsdiqləyirəm”.
Belçika Baş naziri Aleksandr De Kro ölkəsinin ABŞ ilə çoxdankı müttəfiq və etibarlı tərəfdaş olmasına diqqət çəkib: “Belçika qlobal çağırışların öhdəsindən gəlmək, vətəndaşlarımızın rifahını və təhlükəsizliyini artırmaq üçün ABŞ administrasiyası ilə işləməyi səbirsizliklə gözləyir”.
İordaniya Kralı II Abdullah ibn Al Hüseyn də Trampı təbrik edib: “Biz ABŞ ilə tərəfdaşlığımızı yüksək qiymətləndiririk. Daha firavan və dinc dünya yolunda sizinlə işləməyə sadiqik”.
Macarıstanın Baş naziri Viktor Orban da Trampı təbrik edib və ona prezidentlik fəaliyyətində uğurlar arzulayıb.
Almaniya kansleri Olaf Şolts təbrikində ABŞ-nin Berlinin ən yaxşı müttəfiqi olduğunu bildirib: “Siyasətimizin məqsədi həmişə yaxşı transatlantik əlaqələrdir”.
Böyük Britaniyanın Baş naziri Kir Starmer də Tramp təbrik edib. O bildirib ki, Britaniya və ABŞ arasında əlaqələr gələcək illərdə də çiçəklənməyə davam edəcək.
Pakistanın Baş naziri Şahbaz Şərif Vaşinqtonla ikitərəfli əlaqələri gücləndirməyi səbirsizliklə gözlədiyini bildirib: “Donald Trampa ikinci prezidentlik müddətində uğurlu fəaliyyət arzulayıram”.
İsrail Prezidenti Benyamin Netanyahu da Trampı təbrik edib və ona ən xoş arzularını çatdırıb.
Ukrayna Prezidenti Volodimir Zelenski də onu sosial şəbəkə hesabında təbrik edib: “Prezident Trampı və Amerika xalqını Birləşmiş Ştatların 47-ci prezidentinin andiçmə mərasimi münasibətilə təbrik edirəm. Bu gün dəyişiklik günü və eyni zamanda bir çox problemlərin, o cümlədən qlobal çağırışların həlli üçün ümid günüdür. Prezident Tramp hər zaman qətiyyətlidir”.
“Biz hamımız birlikdə çalışmalıyıq ki, bu əsr uğursuzluğumuzu istəyənlər üçün deyil, demokratiyalar üçün böyük və uğurlu əsr olsun. Sizə uğurlar arzulayırıq, Prezident Tramp! Biz fəal və qarşılıqlı faydalı əməkdaşlığa ümid edirik. Biz birlikdə daha güclüyük. Biz dünyaya və xalqlarımıza daha böyük təhlükəsizlik, sabitlik və iqtisadi artım təmin edə bilərik”, - o əlavə edib.
İspaniyanın Baş naziri Pedro Sançes təbrikində bildirib ki, ölkəsi strateji əlaqələri gücləndirmək və ümumi qlobal problemləri həll etmək üçün ABŞ-nin yeni administrasiyası ilə işləməyi səbirsizliklə gözləyir.
Avstraliyanın Baş naziri Entoni Albaneze ABŞ-nin ölkəsinin böyük dostu olduğunu qeyd edib: “Bizim ittifaqımız heç vaxt bu qədər güclü olmayıb. Qarşıda duran imkanlar və problemlər üzərində sizinlə işləməyi səbirsizliklə gözləyirəm”.
Xatırladaq ki, 2024-cü ilin noybrında ABŞ-də keçirilən prezident seçkilərində Donald Tramp qalib gəlib. O, bu gün and içib və vəzifəsinin icrasına başlayıb.
