Türkiyənin Bolu vilayətində Kartalkaya xizək mərkəzində baş verən yanğınla bağlı Türkiyədə bir günlük matəm elan edilib. Bunu Türkiyə Prezidenti hökumət toplantısından sonra açıqlayıb.
Ərdoğan ilk dəqiqədən bölgəyə aidiyyəti sahələrdən məsul nazirlərin və heyətlərin cəlb edildiyini deyib. Qeyd edib ki, yanğının söndürülməsi üçün bölgəyə 156 texnika və 428 nəfərdən ibarət canlı qüvvə yönləndirilib.
Hadisənin baş verməsində məsuliyyət daşıyan şəxslərin müəyyən edilməsi istiqamətində araşdırmalar başladılıb, hazırda bununla bağlı dörd nəfər saxlanılıb.
Xatırladaq ki, Kartalkaya xizək mərkəzindəki oteldə gecə saatlarında başlayan yanğın on saatdan sonra söndürülüb. Hadisə nəticəsində 66 nəfər ölüb, 51 nəfər isə yaralanıb.
ZÜMRÜD
