“Qarabağ”ın Avropa Liqası Liqa mərhələsində 7-ci rəqibi 77 yaşlı Rumıniya FCSB-sidir.
İdman.biz 1947-ci ildə yaradılmış və son dövrə qədər “Styaua” kimi tanınan Buxarest klubunun tarixinə və son çıxışlarına nəzər salıb.
1951-ci ildə ilk dəfə Rumıniya çempionluğunu qazanan klub indiyədək ölkəsində hamıdan çox – 27 dəfə bu titula sahib çıxıb. Son çempion titulunun daşıyıcısı da bu klubdur.
Beynəlxalq arenada komandanın “qızıl dövrü” 80-ci illərin ortalarına təsadüf edir. 1986-cı il Avropa Çempionlar Kubokunun qalibi həmin il UEFA Superkubokunu da qazanmışdı. “Styaua” 1989-cu ildə Çempionlar Kubokunun finalınadək irəliləyə bilmişdi.
Klubun 1987-1990-cı illərdəki uğurlarında rumın futbolunun əfsanəsi Georgi Hacinin imzası var.
Hazırkı ölkə çempionatında FCSB 22 oyundan 38 xalla 2-ci pillədədir və lider Kluj “Universitatya”sından 2 xal geri qalır. Komandanın forvardı Daniel Birliqea 10 qolla çempionatda bombardirlər siyahısında öndədir. Darius Olaru komandasının 8 qoluna imza atıb.
Son qitə mövsümünə komanda Çempionlar Liqasında 3 mərhələ oynadıqdan sonra yolunu Avropa Liqasında pley-offda davam etdirib. Çempionlar Liqasının 1-ci təsnifat mərhələsində San-Marino “Virtus”unu asanlıqla adlayan (7:1, 4:0) FCSB, ardından İsrailin Tel-Əviv “Makkabisi”ni çətinliklə keçib (1:1, 1:0). Elə bu cür gərgin mübarizədə növbəti rəqibi olan Çexiyanın Praqa “Sparta”sı ilə rəqabətdə üzüağ çıxa bilməyərək (1:1, 2:3) yolunu Avropa Liqasının pley-offuna salıb. Burada Avstriya “Lask”ını minimal üstünlüklə (1:1, 1:0) keçən FCSB, Liqa mərhələsinə Latviya RFŞ-si (4:1) və Yunanıstan PAOK-u (1:0) üzərində qələbələrlə başlayıb. Şotlandiya “Reyncers”indən dərs aldıqdan (0:4) sonra 3-cü qələbəsini Danimarka “Midtyullan”ı (2:0) üzərində qazanıb. Buxarest klubunun “Olimpiakos” (Yunanıstan) və “Hoffenhaym”la (Almaniya) son iki oyununda hesab açılmayıb.
Çempionlar Liqası təsnifatlarında komandanın 16 qolundan 4-nü Darius Olaru vurub. Malkom Edjouma və David Mikulesku hərəyə 3 dəfə fərqləniblər. Avropa Liqasında isə pley-off və Liqa mərhələsində Birliqea ilə Olaru hərəyə 3 dəfə fərqləniblər.
Vüqar Məmmədov
İdman.biz
