Romada "Latsio"nun fanatları "Real Sosyedad"ın azarkeşlərinə hücum ediblər.
İdman.biz xəbər verir ki, komandaların Avropa Liqasındakı oyunundan bir gün əvvəl şəhərin mərkəzində azarkeşlər arasında toqquşma baş verib.
"Real Sosyedad"ın təxminən 70 fanatına 80-ə yaxın "Latsio"lu hücum edib.
Polis gələndə hücum edənlər qaçıblar. Hadisə yerindən çəkic, bıçaq, zəncir, açarlar və müxtəlif növ armaturlar aşkar edilib.
Doqquz nəfər yaralanıb. Üç fanat bıçaqlanıb, lakin onların həyatı üçün təhlükə yoxdur. Üç nəfər də sağalma müddəti beş-səkkiz gün olmaqla evə buraxılıb. Daha üç nəfər isə müalicəni gözləməyərək gedib.
Hücum edənlərdən bir neçəsinin şəxsiyyəti müəyyən edilib və araşdırma aparılır.
İdman.biz
