“Tətil dövrü, xüsusilə də qış tətili, şagirdlər üçün həm fiziki, həm də psixoloji istirahət etmələri üçün əhəmiyyətli bir dövrdür”.
Bu sözləri AzEdu.az-a açıqlamasında təhsil eksperti Əmrah Həsənli söyləyib.
Ekspertin sözlərinə görə, şagirdlər üzərində həddindən artıq təhsil təzyiqi yaratmaq onların ümumi sağlamlıq və akademik performanslarına mənfi təsir göstərə bilər:
“Onlar dərslərdəki gərginlikdən, gündəlik təhsil yüklərindən bir müddət uzaqlaşaraq enerjilərini toplamalıdırlar. Tətil, həmçinin valideynlərlə vaxt keçirmək, sosial fəaliyyətlərdə iştirak etmək və şəxsi maraqlarını inkişaf etdirmək üçün də bir fürsətdir. Bununla yanaşı, hər şagirdin tətili keçirmə tərzi fərqli ola bilər – bəziləri dinclik və istirahət istəsə də, bəziləri tədrislə bağlı məsələlərdə yaxından maraqlı ola bilər”.
Ekspert qedy edib ki, əlavə tapşırıqların verilməsi müəllimlərin niyyətinə görə dəyişir:
“Bəzi müəllimlər tətil dövründə dərs prosesini davam etdirmək və şagirdlərin mütəmadi olaraq məlumat almasını təmin etmək istəyirlər. Lakin, bu, şagirdlərin istirahət ehtiyaclarına zidd ola bilər. Yuxarı sinif şagirdləri və ya imtahan dövrü yaxınlaşanlar üçün əlavə tapşırıqlar müəyyən fayda verə bilər, amma təhsil prosesi davamlı olaraq hər kəsin rahatlıq və motivasiyasını nəzərə almalıdır.
Tətil dövrü psixoloji və fiziki bərpa dövrü olmalıdır, yəni şagirdlər bir neçə gün də olsa, dərslərdən tamamilə uzaqlaşmağa, bədənlərini və zehinlərini dincəltməyə ehtiyac duyurlar. Əks halda, şagirdlər yorulub, həvəsizləşə bilər, bu da ümumilikdə təhsil uğuruna mənfi təsir göstərə bilər”.
Ekspert tətil dövründə şagirdlərin dərs oxumaqlarının müsbət və məbfi tərəflərindən danışdı:
“Şagirdlər tətil dövründə öz öyrəndikləri mövzuları möhkəmləndirə bilərlər. Uzunmüddətli tətillər zamanı nəzəri bilikləri unutmamaq üçün əlavə tapşırıqlar faydalı ola bilər. Xüsusilə bəzi şagirdlər üçün tapşırıqlar onlar üçün motivasiya mənbəyi ola bilər.
Mənfi tərəflərinə gəldik də isə şagirdlərin psixoloji olaraq istirahət etməyə ehtiyacları olduğu halda, əlavə tapşırıqlar onların stressini artırar və təhsil istəklərini azaldar. Həmçinin, ailələrlə daha çox vaxt keçirmək və şəxsi maraqlara zaman ayırmaq şagirdlər üçün vacibdir, amma əlavə tapşırıqlar bu balansı poza bilər. O cümlədən, şagirdlər üzərində həddindən artıq təhsil təzyiqi yaratmaq onların ümumi sağlamlıq və akademik performanslarına mənfi təsir göstərə bilər”.
Ə.Həsənli qeyd edib ki, müəllimlər tətil müddətində şagirdlərə öyrədilən mövzuları nəzərdən keçirmələri üçün mükəmməl bir fürsət təqdim edə bilər, amma bunu yüngül və stress yaratmayan şəkildə etməlidirlər:
“Məsələn, şagirdlərə qısa müddətli, maraqlı, praktiki tapşırıqlar təqdim etmək olar ki, onlar həm öyrənməyə davam etsinlər, həm də istirahət edə bilsinlər. Əlavə tapşırıqlar yerinə, şagirdlərin öz maraqlarına uyğun əlavə oxu və ya layihə üzərində işləmələri təşviq edilə bilər. Bu şəkildə, şagirdlər həm təhsildən yorulmazlar, həm də yaradıcılıqlarını inkişaf etdirə bilərlər. Bununla yanaşı, müəllimlər şagirdlərlə açıq ünsiyyət quraraq onların ehtiyaclarını və narahatlıqlarını dinləməli, hər bir şagirdin fərdi ehtiyaclarına uyğun bir yanaşma təklif etməlidir”.
