Avropa Komissiyası çərşənbə günü sənaye sektorunda yaşanan güc itkisini aradan qaldırmaq, süni intellekt kimi yeni sahələrdə ABŞ və Çinlə rəqabəti gücləndirmək, enerji xərclərini azaltmaq və bürokratiyanı minimuma endirmək məqsədilə hazırladığı planları açıqlayıb.
Valyuta.Az xəbər verir ki, rəqabət gücünü artırmağa yönəlmiş bu planlar, Avropa İttifaqının (Aİ) qarşıdakı iki il ərzində polad və avtomobil kimi mövcud sənaye sahələrində, həmçinin biotexnologiya və kvant texnologiyaları kimi yeni sahələrdə tənzimləmə və təşəbbüslərlə bağlı atacağı addımları müəyyənləşdirir.
Avropa Komissiyasının hesabatında "Avropa idarə olunan və tədricən baş verən iqtisadi tənəzzülü qəbul edərsə, özünü uzunmüddətli əziyyətə məhkum etmiş olacaq" ifadələri yer alıb və ötən il yayımlanan bənzər hesabatın yanaşması bir daha vurğulanıb.
Dekarbonizasiyanın başlaması
26 fevral tarixində ilk olaraq, enerji intensiv sənaye sahələrinin karbon emissiyalarının azaldılmasına və təmiz texnologiya istehsalının artırılmasına dəstək vermək üçün nəzərdə tutulan uzunmüddətli "Təmiz sənaye sazişi" qüvvəyə minəcək. Bununla yanaşı, münasib qiymətə enerji təchizatını artırmaq üçün görülən tədbirlər də tətbiq ediləcək.
Həmin gün "Aİ"nin icra orqanı, iri şirkətlərin təqdim etməli olduğu dayanıqlılıq hesabatlarına yönələn, lazımi yoxlamaların aparılması və hansı investisiyaların iqlimə uyğun olaraq etiketlənə biləcəyini müəyyən edən sistemə dair hesabat tələblərinin azaldılması planlarını da açıqlayacaq.
Komissiya bildirir ki, bu, hesabat yükünü ən azı 25%, kiçik şirkətlər üçün isə 35% azaltmağa yönəlmiş bir sıra sadələşdirmə tədbirlərinin ilk mərhələsi olacaq və beş il ərzində 37,5 milyard avro qənaət ediləcək.
Koordinasiya və inteqrasiya
"Rəqabət Kompası" adlı yol xəritəsinə əsasən, dövlət satınalmalarında Avropa şirkətlərinə üstünlük verilməsi və elektrik şəbəkələri ilə enerji saxlanc sistemləri kimi sahələrdə milli siyasətlərin Avropa Komissiyası tərəfindən koordinasiya olunması təklif edilir. Eyni zamanda, investisiyalar, rəqəmsal infrastrukturun yaradılması, süni intellektin tətbiqi və həyati əhəmiyyət kəsb edən dərman istehsalı kimi sahələrdə Komissiyanın oxşar koordinasiya rolunu yerinə yetirə biləcəyi vurğulanır.
Digər təkliflər arasında yenilikçi şirkətlər üçün xüsusi hüquqi rejimin yaradılması da var ki, bu da onların "Aİ"nin ümumi bazar imkanlarından və maliyyə resurslarından daha yaxşı yararlanmasına şərait yaradacaq. Bundan başqa, "Aİ"nin strateji xammal ehtiyatlarını birgə satın alması və müdafiə sənayesi üçün inteqrasiya olunmuş vahid Avropa bazarının yaradılması kimi tədbirlər də nəzərdə tutulur.
Rəhim
