Fransa yığmasının keçmiş yarımmüdafiəçisi Emmanuel Peti “Liverpul”un ingilis cinah müdafiəçisi Trent Aleksander-Arnold haqda söhbət açıb.
Arena.az “Discascino” dərgisinə istinadən məlumat verir ki, Peti, Aleksander-Arnoldu müdafiə bacarığına görə dünyada ən bərbad oyunçulardan biri hesab edir.
Bununla yanaşı, Peti, Aleksander-Arnoldun topla oyun bacarığını çox yüksək qiymətləndirib:
“Mən, Trent Aleksander-Arnold haqda həmişə belə bir fikirdə olmuşam: o, texniki bacarıqlara, heyrətamiz ötürmə və görmə qabiliyyətinə malik əla oyunçudur, amma o, müdafiəçi deyil. O, müdafiə olunmağa nifrət edir. “Liverpul” kimi komandada oynadığınız zaman, komanda yoldaşlarınız bu zəifliyinizi sığirtalaya bilərlər. Amma onun ucbatından “Liverpul” “Enfild”də “Mançester Yunayted”ə az qala uduzacaqdı (2:2). Aleksander-Arnoldun müdafiəsi dəhşətli idi. O, buraxılmış qollardan biri ilə bağlı məqamda çox ölüvay idi. Topla Aleksander-Arnold öz mövqeyinin ən yaxşısıdır, topsuz isə ən bərbadlardan biridir”, deyə Emmanuel Peti qənaətini əsaslandırıb.
Trent Aleksander-Arnold “Liverpul”un yetirməsidir və 2016-cı ilin iyul ayından “qırmızılar”ın əsas komandasında çıxış edir.
İngilis futbolçunun Mersisayd klubu ilə cari müqaviləsinin müddəti 2025-ci ilin iyun ayının sonuna qədər nəzərdə tutulub.
Cari mövsümdə Aleksander-Arnold “qırmızılar”ın heyətində bütün yarışlarda 24 oyuna çıxıb, 1 qol vurub, 5 məhsuldar ötürmə verib.
Aleksander-Arnoldun “Liverpul”un heyətində çıxışının ümumi mənzərəsi 334 oyun, 20 qol və 85 məhsuldar ötürmədən ibarətdir.
Aleksander-Arnold “Liverpul”la İngiltərə Premyer Liqasını (2019/2020), İngiltərə Kubokunu (2022), İngiltərə Liqa Kubokunu (2022, 2024), İngiltərə Super Kubokunu (2023), Çempionlar Liqasını (2018/2019), UEFA Kubokunu (2019/2020), FIFA Klub Dünya Kubokunu (2020) qazanıb.
Trent 2018-ci ilin iyun ayında debüt etdiyi İngiltərə yığmasının heyətində 33 oyuna çıxıb, 4 qol vurub, 6 məhsuldar ötürmə verib.
“Transfermarkt” internet-portalı 26 yaşlı ingiltərəli sağ cinah müdafiəçisi Trent Aleksander-Arnoldun transfer dəyərini 75 milyon avro məbləğində qiymətləndirir.
Əlavə edək ki, Trent Aleksander-Arnold İspaniya nəhəngi “Real”ın maraq dairəsindədir. “Kral klubu” ingilis futbolçunu cari qış transfer pəncərəsində “qaymaqlılar”ın düşərgəsinə qatmaqda israrlıdır.
