...1 yanvar 2025-ci il tarixinə Estoniyanın əhalisi 1.369.285 nəfər təşkil edib ki, bu da Estoniya Statistikasının ilkin məlumatlarına əsasən, əvvəlki illə müqayisədə 5.402 nəfər azdır.
SİA-nın xarici qaynaqlardan əldə etdiyi məlumata görə, 2024-cü ildə Estoniyada 9646 nəfər doğulub, 15596 nəfər isə ölüb.Qeydə alınmış miqrasiya məlumatlarına əsasən, ölkəyə 13826 nəfər gəlib, 13278 nəfər isə ölkədən çıxıb.
2023-cü illə müqayisədə doğulanların və immiqrantların sayı azalıb.
Statistika Departamentinin aparıcı analitiki Terje Trasberqin fikrincə, 2024-cü il 2023-cü ilə bənzəyirdi.
…Keçən il doğulanlardan təxminən 6 min çox insan ölüb. İmmiqrasiya emiqrasiyanı 550 nəfər ötüb. Son iki ildə müsbət miqrasiya saldosu doğuşların çox az olmasını kompensasiya etdiyi halda, 2024-cü ildə əhalinin sayı ümumilikdə 5 min nəfərdən çox azalıb.
Bunu Trasberq bildirib.
Analitik qeyd edib ki, 2024-cü ildə 2023-cü illə müqayisədə doğumların sayında azalma sürətlənib.
…Ötən il 9646 uşaq dünyaya gəlib, yəni 2023-cü illə müqayisədə 1000-dən çox az. 1919-cu ildə statistik məlumatlar müntəzəm dərc olunmağa başlayandan bəri bu, ardıcıl üçüncü ildir ki, rekord aşağı doğum olur.
Qeyd edilməlidir ki, Estoniyada olduğu kimi, son illərdə bütün Avropada doğumların sayı kəskin şəkildə azalıb.
İlkin məlumatlara görə, doğum səviyyəsinin azalması ötən il Latviya və Litvada davam etsə də, Finlandiyada dayanıb.
Yuxarıda qeyd etdiyimiz kimi, 2024-cü ildə Estoniyaya 13 826 nəfər gəlib və 13 278 nəfər gedib, yəni immiqrasiya emiqrasiyanı 548 nəfər ötüb.
Gələnlərin 6200-dən çoxu və ya 45 faizi Ukrayna vətəndaşlığına malikdir. 2022-ci ildə ölkəyə 33,2 min, 2023-cü ildə isə 13,1 min Ukrayna vətəndaşı gəlib.
…Ölkəni tərk edənlərin 5300-ə yaxını və ya 40 faizi Ukrayna vətəndaşlarıdır. Estoniya vətəndaşlarının xalis miqrasiyası, ilkin məlumatlara görə, 500 nəfər müsbət olub: 4700 vətəndaş ölkəni tərk edib, 5200 nəfər isə Estoniyaya gəlib.
Bunu da analitik əlavə edib.
Nazlı Almuradova
