Bu il Azərbaycan xalqının qan yaddaşı olan 20 Yanvar faciəsindən 35 il ötür. 1990-cı il yanvarın 20-də baş vermiş bu hadisə xalqımızın azadlıq və müstəqillik uğrunda mübarizəsinin simvoluna çevrildi. Həmin gecə sovet ordusunun Bakıya daxil olması ilə dinc əhaliyə qarşı törədilən amansız qırğın nəticəsində yüzlərlə insan şəhid oldu, yaralandı və itkin düşdü.
20 Yanvar faciəsi yalnız bir hüzn günü deyil, həm də milli iradənin, xalqımızın azadlıq ruhunun və birliyinin əzəmətli təzahürüdür. Azərbaycan xalqı o dövrdə hər cür təhlükəyə baxmayaraq, öz müstəqillik arzularını yüksək səslə bəyan etdi. Bu qanlı hadisə Sovet İttifaqının dağılmasını sürətləndirən amillərdən biri kimi tarixə yazıldı.
Faciədən sonra Azərbaycan xalqının ümummilli lideri Heydər Əliyev ailə üzvləri ilə birlikdə Azərbaycanın Moskvadakı daimi nümayəndəliyinə gedərək, sovet hakimiyyətinin törətdiyi bu qanlı hadisəyə qarşı öz qəti mövqeyini bildirdi. Heydər Əliyev Azərbaycan xalqına qarşı həyata keçirilən bu cinayəti kəskin şəkildə pislədi və faciənin dünya ictimaiyyətinə çatdırılması üçün ciddi addımlar atdı. Onun bu cəsarətli addımı xalqımızın mübarizə ruhunu daha da alovlandırdı.
Heydər Əliyevin rəhbərliyə qayıdışından sonra 20 Yanvar hadisələrinə hüquqi-siyasi qiymət verildi. Şəhidlərin xatirəsinin əbədiləşdirilməsi üçün mühüm qərarlar qəbul edildi. 1994-cü ildə Milli Məclisdə faciəyə dövlət səviyyəsində qiymət verilməsi Heydər Əliyevin təşəbbüsü ilə mümkün oldu.
Azərbaycan Respublikasının Prezidenti İlham Əliyev də hər zaman şəhid ailələrinə xüsusi diqqət və qayğı göstərərək onların sosial müdafiəsinin gücləndirilməsini prioritet edib. Hər il 20 Yanvar günü ölkə rəhbərliyi şəhidlərin xatirəsini ehtiramla yad edir, bu günün xalqımızın mübarizə tarixindəki önəmini vurğulayır.
Bu gün Azərbaycan xalqı 20 Yanvar şəhidlərinin qəhrəmanlığını və onların mübarizə irsini yaşadır. 35 il sonra belə, bu hadisə bizim üçün unudulmaz bir dərsdir: Azadlıq asanlıqla əldə olunmur və bu yolda milli birlik, iradə və qətiyyət əsasdır.
Şəhidlər ölməz, Vətən bölünməz!
View this post on Instagram
