20 Yanvar faciəsinin 35-ci ildönümü münasibətilə “Security Operation Services” MMC-nin rəhbərliyi və işçi heyəti Şəhidlər Xiyabanını ziyarət edib. Şirkətin nümayəndələri Azərbaycanın azadlığı və müstəqilliyi uğrunda şəhid olmuş qəhrəmanlarımızın məzarlarını ziyarət edərək onların xatirəsinə ehtiram göstərib, şəhidlərin məzarları üzərinə əklillər və tər çiçəklər qoyulub.
Ziyarət zamanı 20 Yanvar faciəsinin tarixi əhəmiyyəti bir daha vurğulanıb və şəhidlərin fədakarlığı haqqında söhbətlər aparılıb. Şirkət rəhbərliyi şəhidlərimizin Azərbaycan xalqının qürur mənbəyi olduğunu, onların qəhrəmanlıq tariximizin unudulmaz hissəsi kimi hər zaman anılacağını bildirib. Bu cür tədbirlərin, xüsusilə gənclər üçün milli ruhun və vətənpərvərlik hisslərinin aşılanması baxımından böyük əhəmiyyət daşıdığı qeyd edilib. Azərbaycanın müstəqilliyinin, azadlığının və ərazi bütövlüyünün şəhidlərimizin qanı bahasına əldə edildiyini bir daha xatırladaraq bu dəyərləri qorumağın hər bir vətəndaşın mənəvi borcu olduğunu vurğulayıblar.
Qeyd edək ki, 20 Yanvar hadisələri Azərbaycan tarixində həm azadlıq mübarizəsinin, həm də milli birlik ruhunun ən parlaq nümunələrindən biridir. Belə ziyarətlər şəhidlərimizin unudulmadığını və onların keçdiyi mübarizə yolunun gələcək nəsillərə örnək olduğunu bir daha göstərir.
“AzPolitika.info”
