“Biz qar voleybolunun inkişafının başlanğıcındayıq, lakin artıq Azərbaycanda bu idman növü üzrə Avropa çempionatının keçirilməsi planları var”.
İdman.biz xəbər verir ki, bunu milli federasiyanın qar və çimərlik voleybolu üzrə meneceri Orxan Hüseynzadə Şahdağ Turizm Mərkəzində 1-ci ölkə çempionatının startını dəyərləndirərkən deyib.
O qeyd edib ki, hələ dekabr ayında burada sınaq turniri keçirilib: “Biz sadəcə olaraq çimərlik voleybolu komandaları ilə gəlib, nə edə biləcəyimizə baxdıq və o zaman başa düşdük ki, xüsusən də ən yaxşı dağ-xizək kurortlarından geri qalmayan “Şahdağ” kimi baza ilə ölkədə qar voleybolunu inkişaf etdirmək mümkündür. İndi bu, federasiya üçün prioritet məsələdir”.
O, həmçinin əlavə edib ki, ilk ölkə çempionatına az sayda komanda qatılıb, lakin növbəti dəfə onların sayı daha çox ola bilər.
Hüseynzadə qar voleybolunun beynəlxalq aləmə inteqrasiyası istiqamətində atılan addımlardan da danışıb: “Bununla bağlı Avropa çempionatının Şahdağda keçirilməsi imkanları nəzərdən keçirilir. Bu idman növü hələ olimpiya proqramına daxil deyil, amma sürətlə inkişaf edir”.
Zəki Feyzullayev
İdman.biz
