Şəmkirdə Azərbaycan Şahmat Federasiyası (AŞF) və Azərbaycan Respublikası Gənclər və İdman Nazirliyinin birgə təşkilatçılığı ilə şahmat üzrə 8, 10, 12, 14 və 16 yaşadək oğlanlar və qızlar arasında ölkə çempionatının seçmə yarışlarına start verilib.
İdman.biz xəbər verir ki, Şəmkir Olimpiya İdman Kompleksində keçirilən turnirin açılış mərasimində Şəmkir Rayon İcra Hakimiyyətinin başçısı Rəşad Tağıyev, AŞF-nin I vitse-prezidenti Faiq Həsənov və digər rəsmilər iştirak ediblər.
Yarış iştirakçılarına uğurlar arzulayan icra başçısı bildirib ki, Prezident İlham Əliyevin şahmata göstərdiyi diqqət və qayğı şahmatın ölkəmizdə inkişafına təkan verib.
AŞF-nin I vitse-prezidenti Faiq Həsənov isə çıxışnda yarış haqqında ətraflı məlumat verib. O bildirib ki, İsveçrə sistemi üzrə 9 turdan ibarət olacaq yarışda yüksək yerlər tutanlar müvafiq yaş qrupları üzrə Azərbaycan çempionatında iştirak hüququ qazanacaqlar.
Qeyd edək ki, ölkə çempionatının seçmə yarışlarında 20 şəhər və regiondan 230 yeniyetmənin iştirak edir.
İdman.biz
