Süni intellekt əsasında fəaliyyət göstərən səs texnologiyaları startapı "ElevenLabs", C seriyası sərmayə turunda 250 milyon dollar məbləğində sərmayə cəlb edib.
Valyuta.Az-ın verdiyi xəbərə görə, bu investisiya ilə şirkətin ümumi dəyəri 3 milyard dollar ilə 3,3 milyard dollar arasında qiymətləndirilib. Sərmayə turuna "ICONIQ Growth" rəhbərlik edib və əvvəlki investor "Andreessen Horowitz" də iştirakçı olub.
Xatırladaq ki, "ElevenLabs" 2024-cü ilin yanvar ayında baş tutan B seriyası sərmayə turunda "Andreessen Horowitz", keçmiş "GitHub" baş icraçı direktoru Nat Fridman (Nat Friedman) və sahibkar Daniel Qrosun (Daniel Gross) rəhbərliyi altında 80 milyon dollar investisiya əldə etmişdi. Bundan başqa, startap 2023-cü ilin iyun ayında 19 milyon dollar sərmayə aldığını açıqlamışdı. Mənbələr bildirir ki, "ElevenLabs" ilkin mərhələdə 4 milyard dollarlıq qiymətləndirmə ilə sərmayə cəlb etməyi planlaşdırsa da, hazırkı 3 milyard dollar dəyər belə, B seriyası mərhələsində əldə edilən 1 milyard dollarlıq qiymətləndirmədən üç dəfə yüksəkdir.
"ElevenLabs" istifadəçilərə sintetik nitq istehsalını təmin edən bulud əsaslı süni intellekt platforması ilə diqqət çəkir. Platforma müxtəlif kateqoriyalar üzrə minlərlə səsi əhatə edən geniş kitabxanaya çıxış imkanı yaradır. Bu platformanın köməyi ilə istifadəçilər dublajlar yarada, audio kitablar istehsal edə və ya filmlər üçün izahçı əlavə edə bilirlər. Bundan əlavə, "ElevenLabs" vasitəsilə səsin klonlaşdırılmasının mümkün olduğunu da qeyd etmək lazımdır. Klonlaşdırılmış səslər müxtəlif dillərdə istifadə oluna bilir.
Şirkət həmçinin sənədləri səsli nitqə çevirən "ElevenLabs Reader: AI Audio" tətbiqi və səs fayllarından arzuolunmaz səsləri təmizləyən "AI Voice Isolator" aləti ilə istifadəçilərin marağını qazanıb. Son olaraq, "ElevenLabs"-ın "Google"-un "NotebookLM" tətbiqinə bənzər şəkildə sənədləri podkast formatına çevirən "GenFM" xüsusiyyəti ilə də diqqət çəkdiyini vurğulamaq lazımdır.
Aydın
