Ajans.az xəbər verir ki, bu barədə “Reuters” məlumat yayıb.
ABŞ administrasiyası ölkənin müdafiə siyasətində böyük dəyişikliklər planlaşdırır. Yeni müdafiə naziri Pete Heqset Pentaqonda jurnalistlərlə ilk görüşündə qarşıdan gələn təşəbbüslərdən danışıb. Bunlara İsrailin Dəmir Qübbə texnologiyasına əsaslanacaq raket əleyhinə müdafiə sisteminin yaradılması daxildir.
Heqsetin sözlərinə görə, yaxın vaxtlarda həm müdafiə, həm də kadr məsələlərinə təsir edəcək bir sıra fərmanların imzalanması gözlənilir. Əsas qərarlara orduda müxtəlifliyi, bərabərliyi və inklüzivliyi (DEI) dəstəkləmək üçün proqramların ləğvi, COVID-19 peyvəndlərindən imtina etdiyinə görə tərxis edilmiş hərbi qulluqçuların geri qaytarılması və raketdən müdafiənin ABŞ versiyası üzərində işə başlamaq daxildir. Nazir qeyd edib ki, bu təşəbbüslər müdafiə idarəsinin rəhbərliyi tərəfindən hərtərəfli dəstəklənir.
Pentaqonun sözçüsü onu da əlavə edib ki, islahatlar ölkənin müdafiə qabiliyyətinin gücləndirilməsinə və administrasiyanın yeni kursuna uyğun olaraq Müdafiə Nazirliyinin işinin optimallaşdırılmasına yönəlib.
Xatırladaq ki, yanvarın 24-də ABŞ Konqresinin Senatı Heqsetin Pentaqonun rəhbəri vəzifəsinə namizədliyi təsdiqlənib. Nazir televiziya aparıcısı və siyasi analitik kimi populyarlıq qazansa da, o, həm də ABŞ ordusunun veteranıdır, Əfqanıstan və İraqda xidmət edib.
