Süni intellekt (Sİ) məlumat startapı "Turing", süni intellekt laboratoriyalarına insan təlimçiləri təqdim edən şirkətlərdən biri olaraq, ötən il gəlirini üç dəfə artıraraq 300 milyon dollara çatdırdığını və mənfəət əldə etdiyini açıqlayıb.
Palo-Alto mərkəzli "Turing", müştəriləri arasında "OpenAI", "Google", "Anthropic" və "Meta" kimi nəhənglərin olduğunu bildirib. Şirkət, 2021-ci ildə 1,1 milyard dollar dəyərində qiymətləndirilib.
Süni intellekt modelləri daha mürəkkəb olduqca, xüsusi biliklərə malik insan təlimçilərə olan tələbat artır. Bu vəziyyət "Turing" kimi startapların, məsələn, ötən il 14 milyard dollar dəyərində qiymətləndirilən rəqibi "Scale Sİ"-nin dəyərini də yüksəldib.
Sİ şirkətləri modellərini inkişaf etdirmək üçün ehtiyac duyduğu sahələrdə məlumat ekspertlərini tapır və bu, həmin şirkətləri yüzlərlə təlimçi ilə işləmək yükündən azad edir.
"Turing" bildirib ki, o, proqram təminatı mühəndisləri və doktorluq dərəcəsinə malik alimlər daxil olmaqla, 4 milyondan çox insandan ibarət mütəxəssis bazasına çıxış imkanına malikdir. Şirkət bu mütəxəssislərlə Sİ modelləri üçün məlumatları etiketləmək üzrə müqavilələr bağlayır.
Lakin bu xidmətlər ucuz deyil: şirkətə görə, mürəkkəb bir annotasiya yüzlərlə dollara başa gələ bilər və inkişaf etmiş Sİ modelləri milyonlarla annotasiya tələb edir. Məsələn, "Meta" şirkətinin icraçısı Co Spisak (Joe Spisak) ötən il bildirib ki, "Meta" Llama 3 modellərini hazırlayarkən 10 milyondan çox insan annotasiyasından istifadə edib.
Sİ laboratoriyaları "məlumat divarı" adlanan, internetdə mövcud təlim məlumatlarının çatışmazlığı səbəbindən modellərin performansının dayanması problemi ilə üzləşdikcə, Sİ modellərini daha ağıllı etmək üçün insan məlumat şirkətlərinə daha çox etibar etməyə başlayırlar.
"Süni intellektin inkişaf qanunlarının davam etməsinə və məlumat çatışmazlığını aradan qaldırmağa kömək edirik," - deyə "Turing" şirkətinin baş direktoru Conatan Siddhart (Jonathan Siddharth) vurğulayıb.
Aydın
