İngiltərə Premyer Liqasının 30-cu turu çərçivəsində “Çelsi” “Börnli”ni, “Tottenhem” isə “Luton”u qəbul edib.
Moderator.az xəbər verir ki, hər iki qarşılaşma paytaxt Londonda baş tutub.
“Çelsi” – “Börnli” oyununda hesabı “zadəganlar” açıb: 44-cü dəqiqədə 21 yaşlı yarımmüdafiəçi Koul Palmer penaltidən fərqlənib. Birinci hissədə qonaqların fransalı yarımmüdafiəçisi Lorents Assinyon, həmçinin baş məşqçisi Vensan Kompani qırmızı vərəqə alaraq qovulublar.
Azlıqda qalmasına baxmayaraq, ikinci hissəyə fəal başlayan tərəf qonaqlar olub: artıq 47-ci dəqiqədə dayaq yarımmüdafiəçisi Coş Kullen adaşı Braunhillin məhsuldar ötürməsindən sonra status-kvonu bərpa edib. Təzyiqi artıran Maurisio Poçettinonun yetirmələri 78-ci dəqiqədə hesabda irəli çıxa bilib: Palmer ikinci dəfə topu tora göndərib, məhsuldar ötürmənin müəllifi isə Rahim Sterlinq olub. Bununla belə, cəmi üç dəqiqə sonra “Börnli”nin irlandiyalı müdafiəçisi Dara O’Şi ikinci qolu vuraraq yekun hesabı müəyyənləşdirib – 2:2.
Londondakı digər matçda “Tottenhem” “Luton”a qarşı oyunda geridönüş edərək üç xal qazanıb. Oyunda hesab erkən açılıb: artıq 3-cü dəqiqədə qonaqların niderlandlı vingeri Tahit Çonq Ross Barklinin dəqiq ötürməsindən sonra qola imza atıb. Matçın ikinci hissəsində “papaqçılar”ın burkina-fasolu cinah müdafiəçisi İssa Kabore topu öz qapısına vuraraq hesabı bərabərləşdirib. Oyunun 86-cı dəqiqədə “mahmızlar”ın koreyalı hücumçusu və kapitanı Son Hın-min 22 yaşlı uelsli Brennan Consonun ötürməsindən sonra oyunda son nöqtəni qoyub – 2:1.
Günün digər qarşılaşmalarında “Nyukasl” “Vest Hem”i (4:3), “Bornmut” isə “Everton”u yenib (2:1). “Şeffild Yunayted” – “Fulhem” və “Nottinhem Forest” – “Kristal Pelas” oyunlarında isə qalib müəyyənləşməyib.
Qeyd edək ki, İngiltərə Premyer Liqasının turnir cədvəlinə 63 xalla “Arsenal” liderlik edir. İkinci pillədə onunla eyni xal toplamış, lakin top fərqinə görə geri qalan “Liverpul” gəlir. Üçüncü yerdə isə 63 xalla “Mançester Siti” qərarlaşıb. İlk dördlüyü 56 xalla “Tottenhem” qapayır. “Çelsi” isə 40 xalla 11-ci pillədədir.
