“Yeni seçilmiş prezident Donald Trampın Panama kanalını ələ keçirməklə hədələməsi ABŞ-nin müttəfiqlərini Rusiya və Çinə doğru sövq edə bilər”.
“Cebheinfo.az” xəbər verir ki, bunu ABŞ Senatının Xarici Əlaqələr Komitəsinin səlahiyyət müddətini başa vuran sədri Ben Kardin ABC telekanalına müsahibəsində bildirib.
Senator qeyd edib ki, Trampın Panama kanalını ələ keçirməsi, Qrenlandiyanın alınması və Kanadanın ABŞ-nin 51-ci ştatına çevrilməsi ilə bağlı son bəyanatları “Amerikanın dünyadakı nüfuzuna” təsir edir.
Bu müddətin sonunda Senatı tərk edən Kardin "Müttəfiqlərimiz bizim etibarlı tərəfdaş olub-olmadığımızı bilmir",-deyib.
Siyasətçi xatırladıb ki, ABŞ və Panamanın öhdəlikləri 1977-ci il Panama kanalı və neytrallıq müqaviləsi ilə müəyyən edilib və Konqres tərəfindən ratifikasiya edilib.
“Seçilmiş prezidentin nə dərəcədə səmimi olması barədə nə dediyini bilmirəm, amma sizə deyə bilərəm ki, bu, bizim etibarlı tərəfdaş olub-olmadığımızla bağlı bütün dünyada suallar doğurur. Bu, həqiqətən də digər ölkələrin Rusiya və Çinlə ittifaqlara girməli olub-olmaması, Amerikanın bütün dünyada onlara dəstək olub-olmaması baxımından Rusiya və Çinə marağını artırır”, - senator qeyd edib.
Kardin Trampın Qrenlandiyanı Danimarka hökumətindən alması ilə bağlı danışmasını və Kanadanın ABŞ-nin 51-ci ştatına çevrilməsi ilə bağlı zarafatlarını, ölkənin Baş naziri Castin Trüdonu ələ salması ilə yanaşı, əbəs söhbət adlandırıb:
“Dünyada biz onun əvvəlki administrasiyası zamanı NATO-dan çıxmaqla hədələdiyi zaman verilən bəyanatlarla eyni tipli bəyanatlar görmüşük. Bunlar bizim müttəfiqlərimizin güvəndiyi müqavilə öhdəlikləridir və bu, Amerikanın bu öhdəlikləri yerinə yetirib-yetirməyəcəyi ilə bağlı ciddi narahatlıq doğurur”.
İkinci Tramp administrasiyası dövründə Ukraynanın gələcəyi ilə bağlı sualı cavablandıran Kardin ABŞ Konqresində hələ də ikitərəfli dəstəyin olmasına baxmayaraq, Trampın Ukrayna ilə bağlı açıqlamalarının “çox narahatedici” olduğunu bildirib.
