Son günlər ölkə ərazisində internetin zəif olması ilə bağlı iddialar səsləndirilir. Bir çoxları məsələ ilə əlaqədar provayderlərə müraciət edib, qarşılığında isə onlara heç bir problemin olmadığını deyirlər.
Məsələ ilə bağlı News24.az-a İT mütəxəssisi Asif Rzayev açıqlamasında bildirib ki, internetin gecikməsinin əsas səbəblərindən biri provayderlərin və Azərbaycana gələn internet xəttinin zəif olmasıdır.
"Çünki digər ölkələrdə internetin verilməsi daha yaxşı və sürətlidir. Ümumiyyətlə, Azərbaycanda bu sarıdan müxtəlif problemlər yaşanır. Ancaq onu da görürük ki, bəzi ofislərdə, şirkətlərdə internet xidməti daha yaxşıdır. Bunun da səbəbi budur ki, provayderlərin istifadəçilərə internetin sürətini müxtəlif surətlərlə verə bilir. Bu həm qəsdən ola bilər, həm də daxili problemla əlaqəli ola bilər", - deyə o əlavə edib.
Mütəxəssis qeyd edib ki, internetin sürəti ilə bağlı problemlər müxtəlif olur.
"Misal üçün internetdə qırılmalar baş verir, bu da xətlərin tam davamlı olmaması, optik xətlərin saz vəziyyətdə olmasından irəli gəlir”, - deyə o bildirib.
Ağa Dadaşzadə
