Bu gün "Mançester Yunayted"ə keçən misirli Omar Marmuş peşəkar futbolçu olmaya bilərdi.
İdman.biz xəbər verir ki, o, Afrikada doğulsa da, yoxsul ailədən deyil.
Marmuşun atası kifayət qədər uğurlu mühəndis olub: valideynləri altı il Kanadada işləyib və o ölkənin vətəndaşlığını alıblar.
Ata Marmuş üçün ən vacib şey oğluna yaxşı təhsil vermək olub. Amma Omar tez-tez məktəbdə dərsləri buraxırdı, nəticədə qiymətlərlə bağlı problem yaşamağa başlayanda atası ona futbol oynamağı qadağan edib.
Məyus olan Omar atasının onun arzusunu məhv edəcəyindən qorxurdu. Ancaq gənc futbolçunun oynadığı "Vadi Deqla" klubunun gənclərin inkişafı üzrə direktoru vəziyyətdən xəbər tutur. Omarın potensialını görən Əbu Qreyşa özü Marmuşgilin evinə gəlir və oğlunun dərslərinə şəxsən nəzarət edəcəyi ilə bağlı ata ilə razılaşır. Klub açıq şəkildə bildirir ki, oğul Marmuş yaxşı oxumasa, o zaman futbolu unuda bilər. Qreyşa futbolun yeniyetmənin məktəbdə oxumasına mane olmayacağına söz verəndən sonra atası onun idmana qayıtmasına icazə verir.
Təhsil aldığı üçün Marmuş bəzən məşqlərdən yayınmalı olur, lakin Əbu Qreyşa dərsdən sonra Omarla işləyəcək şəxsi məşqçi ayırır. Həm dərslərdəki göstəricilərini, həm də atası ilə münasibətlərini yaxşılaşdırır. Bir neçə il sonra Qahirədə Amerika Beynəlxalq Məktəbini bitirir.
Futbolda da uğurları olur. 17 yaşında Marmuş "Vadi Deqla"nın əvəzedici komandasında 28 oyunda 44 qol vurur və keçmiş "Lion"lu və "Çelsi"li Floran Maludanın oynadığı əsas komandaya yüksəlir. Fransalı futbolçu da gənc futbolçunun istedadını görür və ona çox dəyərli məsləhətlər verir.
Maludanı dinləyən Marmuş "Vadi Deqla" ilə peşəkar müqavilə imzalamır, çünki bu, onun Avropaya getməsini çətinləşdirə bilərdi. Cəld tərpənən "Volfsburq" misirlini gənclər komandasına götürür.
"Volfsburq"da o qədər də uğur qazanmayan Marmuş icarə əsasında "Sankt-Pauli" və "Ştutqart"da da çıxış edir. “Ayntraxt”a keçidi isə uğurlu olur və Frankfurtda elə çıxış edir ki, hətta Qvardiolanın özü onu komandasında görmək istəyir.
İdman.biz
